... حلم مواطن

أضرب أكثر من نصف سكان المملكة بسبب رفع أسعار البنزين قرش واحد, و أصبحت المواصلات وسيلتهم للتنقل داخل المملكة و فضّل البعض ركوب الدراجات الهوائية على أن يُستغل من قبل الحكومة, أما من جهة أخرى استقال مدير عام الجمارك بعد أن سمع بخبر فرض ضرائب على السيارات الهجينة, و أضرب عدد من التجار في المنطقة الحرّة إحتجاجاً على فرض ضريبة قيمتها 50% على هذه السيارات الصديقة للبيئة ونظّم هذه الإضراب وزير البيئة الأردنية …

على صعيد آخر, تزامن قرار رفع الأسعار و فرض الضرائب على سلع كثيرة كالقهوة و رفع تعرفة الكهرباء و المياه مع الحدث العالمي الذي ينتظره الملايين كأس العالم, فشعر المواطن الأردني بإستغباء الحكومة لتفكيره وطالب بإقالة الحكومة الحالية… هذا و أيضاً قاطع المواطنون شركات الإتصالات بعد فرض ضريبة تلو الضريبة على بطاقات الشحن التي يدفعها المواطن بدلاً من أن يتم إقتطاعها من أرباح هذه الشركات...

أطلقت جمعية حماية المستهلك حملات توعية للمواطنيين وتعريفهم بحقوقهم و …

صحي السيد مواطن من النوم على خبر رفع الدعم عن بعض المنتجات و فرض ضريبة على البنزين, فراح و لحق حالو و إشترا 10 كيلو قهوة و 15 كروز دخان و فلل السيارة...

ورجع نام و هوه مبسوط و ضاحك عالحكومة....

و يلي بيحكي كلمة وحدة عن حكومتنا هادا واحد ما بيفهم, لإنه حكومتنا من أكثر الحكومات ذكاء, و عارفة يلي بتعمله...

عارفة إنه لو رفعو السعر للسما ما حدا رح يعترض...

عارفة إنه أيا حدا رح ينتقدها رح يطلق عليه لقب "غير الوطني"

عارفة إنّا شعب ناقَض نظرية علمية (لكل فعل رد فعل)

بس مش عارفة إنه بيوم ... رح ينفجر إشي... يا إما المواطن... يا إما الخزينة قد ما لمّو مصاري...

الزواج التقليدي

واحد من أكثر المواضيع إستفزاز بمجتمعنا بالنسبة إلي بعد الثقافة الموسيقية هو موضوع الزواج التقليدي, يلي مش عارف كيف بنت بتقبل عحالها تكون بموقع بوكسة فقوس مع إحترامي لكل البنات يلي تجوزو بهالطريقة, و تخلي واحد يجي يطلع عليها و يفحص و ينقي…

و مش عارف عن الشب يلي لا بيكون بعرفها ولا عمره شايفها ولا بيعرف إهتماماتها لهل بنت كيف بده يقضّي معها كل حياته, قال والله رحنا و شفناها مشالله عليها جمال و أدب و أخلاق!!! طب ما أنا لو رحت أخطب هيفا وهبي رح تقلب شريفة مكة بالبيت…

السيناريو الأول: إنه الشب بده يخطب صاحبته, فبيجي على أهله و بيحكيلهم, طبعا أول جواب رح ينحكاله "هيه صاحبتك يعني كانت مصاحبة غيرك" و بيبلشو يشككو بالبنت و همه مش عارفينها, طب برأيكم شو الأحسن؟ تتجوز وحدة إنتا مصاحبها و عارف شخصيتها… ولا وحدة رحت عندها 3 أيام و بعدها سألت عنها الجيران و أهلها و حكولك إنها منيحةّ!!! شو بيضمنلك بهاي البنت! ولا عشان أهلها محترمين لازم تكون محترمة؟ ياما كان لكل عيلة بلوعة… ممكن تكون هيه هالبلوعة.

السيناريو الثاني: البنت مصاحبة الشب, و همه تقريباّ قد بعض و الشب بيبني بحاله لسه… و تيجي عليه البنت تحكيله أنا كل يوم عم بيجيني عرسان عالبيت و مش قادر أشرح لأهلي الموضوع! هون بتصير هاي العلاقة ضحية عاداتنا, البنت ما بتقدر تروح على أهلها و تحكيلهم هيك هيك هيك لإنه يا إما بتروح فيها طخ, 
يا بيجوزوها إبن عمها عالبدري, يا إما إذا كانو كثيييير منفتحين بيحكولها جيبي بكرا يخطبك… طبعا الشب بيكون لسا يدوب بلش يشتغل و بيسكر عالموضوع…

 السطحية: بحس عنا كثير سطحية بالتعامل مع أمور الزواج… من ناحية البنت إنه لازم الخطبة و العرس بأحسن فندق و عشا و شهر عسل بكوالا لمبور و شقة بدير غبار مطلّه عالبحر الميت و أهم أهم أهم أهم إشي المهر!! هادا يلي يتثبت في ذاتها… يعني مش حلوة تتطلع بالرخيص, يعني ما بتطلع بأقل من 9! موديل سنتها البنت شو بتحكي إنتا! طب ما هوه يا بنتي رح يتشحطط تيجيب المصاري و يشحططك معه, هيه بتكون ناسية إنها تجوزته و رح تعيش معا؟؟؟ و الشب طبعاّ السطحية تاعته على أسخم... بيكون بيدور عالشكل الأخ و إذا بترد عليه ولا لأ و إذا إمه بتحبها.

سن الزواج: سن الزواج أنا برأيي للمرأة من 24-100 ما في إشي بقاموسي إسمه عانس, بمجتمعنا نسبة العنوسة عاليه زي ما بيكتبو بالجرايد… عنّا بالأردن العانس هيه يلي صار عمرها 26!! و ببعض المناطق 24 عانس… فغصبن عنها بدها تكون نسبة عالية مع الأزمة الإقتصادية, يلي الشب بيكون عم بيفكر كيف بده يغطي مصاريف الخطبة و العرس و المهر و البيت  و و و و…. فبيحكيلك ليش أجيب لحالي الهم؟ هينا عايشين…

الطلاق: نسبة الطلاق عنا بإرتفاع مستمر و طبعا بما إنه الواحده متجوزة عشان المصاري و نكبته للزلمه رح تفرط الشغلة… أو هوه من سطحيتة ماخدها على شكلها أكيد كمان ما بيكملو…

بالنهاية الموضوع كالتالي:

-         المفروض: لقاء , إعجاب, حب, خطبة, زواج.

-         الواقع     : لقاء, خطبة, إعجاب, زواج, و عاد الحب إنتا و حظك!

فكيف بنتوقع حياه زوجية ثابتة إذا أهم عنصر مش موجود فيها؟

صحيح إني خروف

اليوم قلت يا زلمة روح إتبعزق و إسلخها بكوفي شوب من الآخر و أرجل أرجيلة تمام بلاش قهوة منا و فينا اليوم و المصاري وسخ إيدين والواحد ما بيعيشش إلا مرة ومن هالحكي… رحت طلعت أنا وصاحبي على الكوفي شوب الفلاني بجبل عمان تحديدا, إجا الشب و تفضلو و مش عارف شو وشو بتحبو تشربو…الأرجيلة بـ 4 دنانير قلناله بس بدنا أرجيلتين وسلامتك, و كل واحد طلع الابتوب تاعو و قعدنا و جابولنا شغلات و بوشار و بحكيلنا هدول ضيافة فإنه الله يزيد فضلك…

خلصنا وإنبسطنا ولعبنا و بدنا نروح… الحساب يا معلم… 15.20 دينار…

صاحبي الله ستر لحقنا بكلونيا لَصحي… سبحان يلي خلى ال 8 دنانير 15 أي والله لو إنهم بيبيضو! ناديت البنت يلي هناك بحكيلها إشرحيلي شو هاد بالزبط… فحكتلي ما هو في 3 cover charge فإنه انا اه صح... و عم بدفع و أنا مش مقتنع... عشو الـ Cover Charge  بالزبط؟؟ و يا سيدي 3 دنانير هيك الباقي شو؟؟ 10%  Service Charge و 16% ضريبة مبيعات... أحا

يعني نصب عيني عينك! نفسي أدخل بحياتي كوفي شوب ما أنصدم بالفاتورة تاعتو و أحسها واقعية, و ليش ما تنكتب الأسعار عالـ Menu و تكون صح؟ ولا بعد ما يوقع الفاس بالراس وتتعكم؟ يعني الواحد بدو يتلقاها من وين ولا من وين؟؟؟ من شركات الإتصلات ولا من الحكومة ولا من الضرايب ولا من جرار الغاز ولا من الكوفي شوبات؟ معقولة يعني إذا بدي أطلع على محل و أأرجل في أدفع سبع دنانير و نص!!! يعني عفوا من المحل بس والله لو إني مأرجل أرجيلة فيتامين سي و الفحم توصايه من المريخ و الطلة تاعت المحل من القمر على الارض  ما بدفع هيك... 

!!! بكره الشتا

سألت كثير ناس عن رأيهم بالشتا و إنه إذا بيحبو ولا لأ, فكانت معظم الأجوبة من البنات إنه يااي شو إنه الشتا بيجنن و حلو وكتيييييييييير رومنسي… بسأل الشباب بيروح فاقعلك Pause شيوخي و بيقلك المطر خير يا إبني... بس أنا مش شايف إنه حلو ولا بيجنن ولا رومنسي و عارف إنه خير و زرع و مش عارف شو... بس هل إحنا حكومتنا (الله يخليها بلا ما يزعلو) مجهزه شوارعنا لهل شتا؟ أنا أول إشي بشوفه بالشتا الشوارع الغرقانة و الزفتة يلي قبعت من محلها و التصريف اللي زي العما و السيارات يلي على جنب الشارع و حوادث... مبارح تخيلو نفق سيارات مسكّر و معبا مي, يعني بالمختصر نفق ما في تصريف...

أنا من خريجين الجامعة الهاشمية فيعني لما أروح عالجامعة كنت أفوت إشي إسمه رغدان, وما أدراك ما رغدان بالشتا... أكبر تجمع للطينة و القرف و زيت محركات الباصات... بتوصل هناك على شكل بني آدم و بعدين بدك تشمر هالبنطلون عشان تستعد للغوص في معركة ركوب الباص (عالواقف طبعاً) هاد بيدفش من هون على طرطشة باص خيانه* من الخلف على زواريب مياه من الزينكو يلي فوقك بتوصل الجامعة على شكل جندي طالع من الحرب... طبعا هاد كله غير التكاسي يلي بيكون ينقي الركاب تنقايه و إنتا و حظك عاد....

و برجع للبنات يلي بيشوفو الشتا رومنسي إنه يعني شو الرومنسية إنك تطلع بالشتا و تنبلّ و تتطرطش و طيّن و بس تفكر ترجع على سيارتك تطفي... غير الكاّبة النفسية تاعت الجو العام... و خذلك عاد واحده من هال ناس يلي بيكونو حبيبه بالشتا حبيبها يتركها... و تحط أغنية حبيتك بالصيف... نطرتك بالشتا... أي حتى فيروز كانت عارفة إنه رح يتركها بالشتا... وبس خلص فشيت غلي...

* باص خيانة هوه باص بيعبي الطلاب عالواقف و القاعد بدون ما يعبي ركاب من الدور و دايماً بيجي غدر.

بتعرف شو هوه الإحتباس الحراري؟

أنا بصاراحة ما كنت أعرف إشي عنو قبل أشهر وبعد ما تعمقت بالموضوع وكان الفضل لصديقتي صفاء الناشطة البيئية بجمعية البيئة الأردنية وحبيت أتعمق بالموضع تأعرف عنو أكثر, رح أحكي بصورة بسيطة عنو وبطريقة مفهومة... إذا بتلاحظو الصورة يلي رسمتها (فنان أنا :P) بتبين الإشعاعات يلي عم تطلع من الشمس إشي منها عم ينعكس من الغلاف الجوي و إشي بيخبط بالأرض و بيرجع يطلع و إشي بيخبط بالأرض و بيضل داخل الغلاف الجوي لإنو عم بيواجه إشي وهوة راجع إشي إسمو الغازات الدفيئة يلي زادت عن حدها مع الثورة الصناعية زي مثلا ثاني أكسيد الكربون و الميثان... و هادا الإشي عم بيزيد من درجة حرارة الأرض و هادا الإشي بيعمل كوارث بيئية زي الفياضانات...

معلومة: بتعرف إنو في دول عم تغرق زي بنغلادش و الملديف و إنو في دول كثير كمان معرضة لهل إشي زي قطر, عُمان و دلتا مصر؟

بان كي مون جمع الدول بكوبنهاجن عشان هالإشي يلي عم بيصير و عشان يخففو من الإنبعاثات يلي بتسببها الدول الصناعية, طبعا المفروض إنو يكون مؤتمر مفتوح ونشطاء بيئيين يشاركو في, بس قلبت كلها إجتماعات مغلقة لرؤساء الدول الكبيرة زي أوباما حبيب الشعب يلي كان من أكثر المشجعين للفكرة و بعدين نخخ...  و طبعا المواقف العربية المشرفة!!! زي السعودية يلي ما تنازلت ولا بإشي لحماية البيئة و رح إتضل تنتج بنفس الطريقة يعني راحو على هالإجتماع لحماية البيئة و كل واحد جاي بطيارتو الخاصة منهم يعني لوّثو البيئة كلها و ما عملو إشي لو ما راحو أحسن...

كل القرارات يلي طلع فيها المؤتمر هيه شغلات ما بتفيد إلا الدول الكبيرة و رح تطلع على راس الدول النامية.

مستوى وعي الشعب عنا بالبيئة طبعا صفر و على مستوى إحنا كأفراد الواحد فينا الزبالة تاعتو بيكبها و كياس البلاستيك بيكثر منها (بتقدرو تقرأو المقال تاعي عن هاد الموضوع) عمرنا ما رح نفهم شو عم بيصير حوالينا, ما بنعرف إنو كل سنة عم بيقل المطر بسبب الإحتباس الحراري بس بناخدها من ناحية بيجوز الله عضبان علينا! و بنروح عالمسجد و بنضل ندعي اللهم سقنا الغيث... طب ما هوه ربنا حكالنا إنا نوخد بالأسباب! بس لأ بنضل مصرين...

 شكرا لصفاء طبعا على المعلومات و لإنها ساعدتني بهاد المقال  :)

جرائم الشرف بالأردن

مبارح كانت جريمة الشرف الـ 19 بالأردن من أول السنة لهلأ, طبعا هدول الـ 19 المعلن عنهم غير الحلات يلي بيتسترو الأهل عليها عشان الفضايح, ظاهرة "الشرف" صارت عم بتزيد و المسؤولين بحاولو يخلوها إنها حالات فردية و مش موجودة...

طبعا أنا برأيي أساس المشاكل هيه المواد 340 و 98 من قانون العقوبات الأردني يلي بما معناهم تتخفف العقوبة على  القاتل يلي إلها دخل بالشرف اذا مسك المجني عليها متلبسه بعلاقة جنسية غير مشروعة و القاتل كان بيقرب للضحية أو كان معصّب الأخ.... طبعاً أنا بحكي تخفيف يعني ممكن العقوبة تتخفف للنص إذا مش أكثر كمان, غير العيله يلي بتستخدم الحق الشخصي "الفيتو" عشان تستأنف الحكم و تطلب كمان تخفيف...

بالمقابل البنت يلي ممكن إنو ما تكون عاملة إشي بس الشك فيها خلاها عرضة إنها تموت من دون ما حدا ياخد حقها لا حكومة ولا أهل وطبعا أغلب الضحايا من جرائم الشرف بيكونو عذارى, أما الشب عين الله عليه بيروح و بحكي لصحابو شو سوّا و بيكون مكيف لإنو ما في عندو إشي يخاف منو...

يعني شو هوه شعور القاتل لما يقتل أختو؟ هل هوة بدافع الدين؟ أنا ما تعتقد الدين حكالنا أقتلو هيك... أعتقد إنو هاي عادات بمجتمعنا لازمها تغيير جذري... يعني مين إنتا تحكم على وحدة و تقتلها ؟! يا أخي مش عاجبيتك أو شاكك فيها قلعها برة البيت إذا ما بدك إياها... يلي هيه أختك يلي تربيت معها... بس تقتلها؟؟!!!

كل المقالات يلي كنت أقرأها عن جرائم الشرف كانت بتربط الوضع الإقتصادي بالموضوع, يعني نسبة جرائم الشرف عند الناس الفقراء بتكون أكثر من الناس الأغنياء بكثير... و أكيد الوضع الإقتصادي بأثر على التعليم, لإنو أكثر الفقرا بيضطرو يتركو دراستهم عشان يشتغلو و أغلب القاتلين بجرائم الشرف همه ناس مش متعلمين و مش متجوزين يعني ما في عندهم إشي يخسرو...

يا جماعة الموضوع زاد عن حدو وصار لازم يكون في توعية أكثر!

على كل حال هينا بنستنا بمجلس النواب الجديد, على الله يقدرو يعملولهم شغلة ويلغو هالمواد بالقانون.... أو على الله هالشعب يقدر يصوت ليلي إلو الحق بالكرسي مش لقرايبو و ولاد عشيرتو...

افلامنا هادفه؟!!

معقول ثقافة الأفلام عم تتراجع كمان زي ما عم بيصير بالأغاني؟ لاحظت آخر فترة إنو الأفلام العربية صارت كلها أفلام هشك بشك... بس تعليقي مش على الأفلام, تعليقي على الدعاية يلي لهاد الفيلم الفاشل أنا برأيي, يلي عملية تسويقو عن طريق لحم البنات يلي في...

بكون قاعد مع صحابي بالقهوة, بتيجي دعاية فيلم هيفا, فبتلاقي بلش الحوار عن الفيلم بين يلي حاضرو و يلي مش حاضرو... الأول: ولك شكلو الفيلم ناااااار! الثاني: يا زلمة واقع "Wage3" الفيلم فشي في إلا لقطتين... 

يعني صار موضوع نجاح الفيلم إنو هيفا شلحت ولا لأ... أفلامنا مع الأسف صارت تافهه و المشاهد صار أتفه, مقياس الجرأة عنا صار قديش الفيلم في وقاحة! 

غير هيك في أفلام عربية و أردنية مثل كابتن أبو رائد يلي أخذ جوائز عالمية كثيرة و كان رح يترشح لجائزة أوسكار و هوه فيلم أردني, بس 25% بالأردن يلي بيعرفو إنو في فيلم هيك إسمو, في فيلم Paradise Nowفيلم أكثر من رائع عن العمليات الإستشهادية بفلسطين, و ترشح لجائزة أوسكار لأفضل فيلم أجنبي... بس وين الإعلام عن هاي الأفلام؟ ولا فيلم هيفا أحسن منهم؟ 

بعدين أحلى إشي عنا صار إنو كل واحد إنشهر و صار يغني... بيصير بدو يعمل فيلم, زي الأخ تامر حسني, مشالله الفيلم بيكون trailer للألبوم تاعو... 

و في الأفلام الأردنية القصيرة يلي فيها إبداعات وأفكار كثير رهيبة بس ما في داعم لإلها! و بالآخر بيجي علي صاحبي بيحكيلي ليش ما بتحضر أفلام عربي... 

أي جيبلي فيلم أفكارو زي V for Vendetta أو Lord Of the Rings أو The Godfather أو جيبلي ممثل زي Sean Penn و Alpacino و Robert De Niro و و و....

زمن السينما المصرية انتهى يا ريت نلاقي حدا يرجع يحي السينما العربية ...

أخنق حالك بعيد عناّ!

طلعت هداك اليوم بتكسي, وين طالع؟ على نزال, فما عجبو شكلو, و طلع هالسيجارة, فإنو أنا لو سمحت بس ممكن تأجلها لبين ما نوصل... لإنو مش محرزة يعني... فاطلع فيه... و ضب السيجارة و ضل يتنفتر فيه لبين ما وصلنا, معقول أنا وقح لإني عملت هيك؟ لإني حسيتو إنصدم كثير... يعني حسيت حالي أول واحد بالدنيا بطلب هالطلب.

التدخين عنا صار موضة للكبار و الصغار, و صار يلي بيدخن بيكون وضعو طبيعي و و يلي ما بيدخن بيكون وضعو إشي غلط... هسه أنا مش ضد يلي بيدخن أو التدخين نفسو لإنو كل واحد حر بيلي بدو يعملو بحالو... وأنا بآمن بإشي اسمو الحرية الشخصية بس بآمن بإشي ثاني يلي هوه حريتك بتنتهي لما تبلش حريات الناس يلي حواليك...

بباص الجامعة الهاشمية ايام الجامعة, كنا نطلع بالباص والمفروض إنو ممنوع التدخين في, بتلاقي ناس عم بتدخن... فالشوفير تاع الباص بيوقف هالباص و بيقعد يدور على ابن هالـ... حلال غير إنو ناس بتنخنق و بتكون مستحية أو مش مستاهلة طوشه... بس تحليلي الشخصي للعالم هاي إنو في نقص بشخصيتهم و بيحاول يثبتها بإنو يكسر القوانين يلي حواليه... يعني كيف تحكيلوا بجلالة قدرو طفيها؟ مش قادر تصبر عشان هالسيجارة؟ خلص كبست؟ والمشكلة إنو بيكون لسا مطفي سيجارتو عالباب... غير هيك صحابي بكون طالع معهم, من مكان لمكان و عمان يعني أبعد أمكان فيها بتاخد 20 دقيقة بتلاقي واحد طال سيجارتو و صار يدخن... يعني مش فاهم جد مش فاهم شو بيكون يفكر أو ليش بعمل هيك؟

يعني أنا بعرف شغلات عن الدخان إنو الواحد بيدخن لما يعصب أو بعد الأكل أو لما يزهق أو لما يحس إنو بدو يدخن, بس العالم عنا بتدخن أوتوماتيك قبل الأكل بعد الأكل و عالأكل...طبعا الحكومة نزلت قرار إنو ممنوع التدخين بالأماكن العامة... بس هل معقول إنها رح تصير تخالف الواحد يعني؟ والله ما أعتقد لإنها قوانين عالورق, و بستنوا الناس يلي عنا يفهموا, بس مشالله علينا...

غير هيك التدخين بالأماكن المغلقة... يعني أنا من أول ما نولدت و أبوي بيدخن بالبيت, وعادي ولا كأنو في ولاد زغار... ولما يجي ناس عنا كمان بيقعدوا و بيدخنوا, فبيقلب البيت ليخة... و الولاد طبعاً بيتعلموا... يعني هل معقول إزا الواحد دخن بره بيتو بينقص من شخصيتو؟ أو إذا طلب من الضيف عندو يدخن برة بيكون وقح؟ وآخر إشي لما الولد بيكبر و بيشوفو أبو بيدخن بيلعن ***********! فعلاً إنا عايشين بتخلّف...

يزيد

أغنيلك؟ أرقصلك؟ تجاوب هالسؤال و تخسرلك ربع ليرة؟

في شغلة صايرة هالأيام انو شركات الإتصات عم تستغل المشتركين و المشترك ولا عبالو… شغلة الدعايات يلي عم توصلني و توصل كل واحد… دعايات و مساباقات و ربحت مش عارف شو و نزلت أغنية أهل العزم على مكتبة الأغاني فقط بـ 35 قرش… فا الواحد ما بيرد بيرودو يبعتو صارت الأغنية بعشرين قرش… بعدين صارت ببلاش بس بعرض أختك نزلها! غير المساباقات التافهة… و بصراحة الأتفه يلي بيجاوب شركات هالنصب العلني…

طب أنا ما بدي حدا يبعتلي مسجات و ما بدي دعايات و حكي فاضي, حقي إنو رقمي ما يستغلو حدا عشان دعاية ولا مش عارف شو… أنا حكيت مع أمنية و قلتلهم ما بدي يوصلني إشي عشان ما إلي أيا مصلحة بأيه عرض بيعملوا أول أكم أسبوع والله و بطلوأ يبعتوا و بعدين ردو رجعوا… فـرديت حكيت معهم, ثاني مرة كان جواب البنت يلي ردت علي إنو إنتا من مشتركينا و إحنا إلنا الحق انو نبعتلك, فحكيت مع حدا من أمنية بيفهم بهالشغلات حكالي مرات بيوصلك مسج من شركة غير شركة أمنية و بتكون دعاية طبعاً, شركة أمنية بتبيعهم الأرقام تاعتنا! طب وين الخصوصية! و حكالي إنو في شغلة إسمها القائمة البيضاء ((White List هاي القائمة بالأرقام يلي ممنوع ينبعتلها هاي الدعايات... و كل مشترك إلو الحق إنو يكون فيها, و حكيت مع خدمة المشتركين و خليتهم ما يبعتولي مسجات... فياريت كل واحد يحكي معهم , الله بعينكم على هالخمس قروش تعون خدمات المشركين, بس عشان تعرف شركات الإتصالات إنو مشتركينها ناس واعية ليلي عم بيصير...

يعني إحنا شركات الإتصالات صايره ماخدة علينا للسما! من خدمة التقارير يلي صارت بقرش لقصة إدفع بعدين إعترض, للخدمة الزبالة يلي بدك عالقليله 15 دقيقة لبين ما يردوا عليك إذا ردوا كمان... والشعب بيشحن الموبايل و ساكت...

أي أنا لو إني شركة إتصلات و عندي مشتركين زي هيك! إلا أنزل خدمة قرشين ع كل Miss call... وهادا الغلط مش عالشعب بس, كمان في غلط عالحكومة يلي سايبيتهم يعملوا يلي بدهم إيا...

يزيد

في شوارع الأردن...

شوفير تكسي رمى كاسة القهوة الصباحية من شباك السيارة... شباب بيوكلو وجبات خلصوا و رموها... بنت طالعة مستعجلة عالجامعة شحنت الموبايل عشان تحكي مع حبيبها و رمت الكرت عالأرض... بس كل هالشغلات بتهون لما تشوف ولد صغير بيعيّط و حامل حبة بوظة بدو إمو تفتحلو اياها... والأم بتفتحلو إياها و بترمي الورقة عالأرض... يعني أنا كنت مفكر إنو رح نوصل لجيل ينهي الظاهرة السيئة عنّا... بس طول ما الجيل يلي بعدنا عم بنربي إحنا... عمرنا ما رح نصير...

كنت بحكي مع صديقي إني رح أكتب عن هادا الموضوع, فكان جوابو إنو الحكومه مش موفرة الحاويات في كل مكان... أنا رح أرد عليه إنو لهسا أنا بتذكر سلات الزباله يلي الأمانة ركبتهم عنا بالحارة و الولاد كسروهم و خربوهم... غير هيك عامل النظافة هو يلي رح يشيل زبالتك لما ترميها جكر بالحكومة,أي والله عامل النظافة يلي عنا بالحارة من كتر ما بيجي و بيروح انهلك, القصه بطلت قصة حكومة و شعب القصة صارت قصة عقلية فينا, إنقلبت الموازين لازم نرمي عالأرض و يلي بيروح يرمي بالحاوية هوه الشاذ فينا, لأ و في شباب بتكون مستحية تروح تكب الزبالة بالحاوية بلا ما الشباب يتخوتوا عليه, وبعدين بطلعلك واحد نغش بحكيلك يا زلمة إرمي إرمي إنتا بالأردن, هو هيك كتيييير كوووول! وبعديها بسلخ نغشة إرمي يا زلمة بلكي حطوا كمان زبالين و خفت البطاله,إنو شو بالنسبة! هاي بلدك! و إذا إنتا بلشت بحالك و الكل بلش بحالوا رح نوصل لشوارع نضيفة, مش بنوصل لهاي الشغله لما الحكومة تحط كميرات مراقبة "وهاد يلي صاير هسّا" بس ليش إحنا ما نغير حالنا؟ يعني الحكومة لو حطت كاميرات بكل مكان ما رح يتغير إشي!

طبعاً هادا الحكي غير عن المناطق السياحية يلي إشي بخزي زبالة فيها والإشي الوحيد يلي بضلوا معلق براس السياح لما ييجو عنا... غير طبعاً الرحلات يلي هيه المفروض تروح على مكان تغير جو في مش مكرهة صحية من الزباله يلي بنرميها... طبعا كلها كياس بلاستيك! و الكل بيعرف إنو البلاستيك ما بتحلل و كلو مواد سامّة, الدول المتقدمة طبعا بتستعمل كياس ورق بس إحنا على راسنا ريشه ما بنحب, ولما نروح على محل... بالله عمي بدي سائل جلي و بكيت شبس و علبة لبن كل وحدة بكيس عشان نطلع كسبانين من المحل, وهاي كمان خطوة لازم نعملها, ليش ما نستعمل كياس ورق؟...

طبعاً غير عن الناس يلي بيوصل الحاوية و بزت الزبالة جنبها... ويلي زبالتو على باب بيتو و بتكون الكياس مفتّحه و الزباله عالأرض! يعني الأمانة مش طالبة منك تعزل البلاستيك والمعادن والخبز والمش عارف شو عن بعض عشان يعملوا إعادة تصنيع للمواد! كل يلي طالبينو تحطها بطريقة منيحة قدام بيتك!

و بيجيلك بالآخر واحد بحكيلك عمان من أنضف العواصم العربية! يا سيدي على راسي وعيني بس حرام نكون من أنضف العواصم بالعالم؟

يزيد

ضلكم تسلـّو لتشبعوا !!!

أكيد الكل فينا بيعرف موقع الـ Facebook , الموقع عبارة عن شبكة اجتماعية و الكل بيتعرف في عبعض و بيقدر يضل متواصل مع صحابو و يعرف شو بيعملو, و بيقدر كمان يفوت على Groups و يناقش بالشغلات يلي بدو ايها من السياسة للأغاني...
بس في كتير ناس منا فاهمين الـ Facebook غلط !, يعني أنا بفوت عالـ Facebook تاعي يوميا و كل يوم لازم أشوف ناس عاملة Quizzes, شو هالفراغ يلي عنا مش فاهم, بسأل ناس إنو ليش بتعملو؟ الجواب دايماً... يا زلمة هينا بنتسلى...
شكلك هيبقى الزاي يوم زفافك؟ (للبنات فقط)... شكلو أول ما عملو كاينين بس شباب يفوتو عليه... و بيحطلك صورة... طب إنتي يلي عملتي هادا الإشي و ضيعتي وقت لا يقل عن 5 دقايق و طلعتلك صورة, و حلوه, جد بتنبسطي؟؟ وإنو هيك بيصيبك شعور "يسعد الله"؟ طيب سيبنا من هاد... هل أنت من محبي الشاي الأخضر أم الأحمر؟ إنو هادا أنا لهسا مش فاهم مين يلي عملو, يعني إنتا جد مش عارف ولا بتتسلا؟ طب وين التسلية بالموضوع؟
طبعا هادا كلو كوم و الوقاحة يلي بهالـ Quizzes كوم تاني... حسب المعلومات يلي وصلتني و بيجوز يلي مجرب ومن محبي الـ Quizzes إلا ما صارت معا... بيكون الإسم كتير بريء وعادي بس بتكون الأسئلة إشي من الأخر, غير عن الـ Quizzes يلي كلها نعرات عنصرية وإشي بيخزي...
انا يلي بدي أحكي انو الناس يلي عامله هالـQuizzes هاي همه ناس زينا زيهم... و إنتا كل مرة بتفوت فيها عالـ Quiz بتكبس على كلمة Allow عمرك فكرت انو على شو Allow ؟ خلينا نقرأ على شو...
Allowing “this quiz” will let it pull your profile information, photos, your friends' info, and other content that it requires to work.
وإحنا مكيفين ع حالنا بيفوت الواحد مندمج مع الإسم تاع الـ Quiz ومش شايف قدامو... طب المعلومات تاعتك و الصور و كل إشي عندك صار عند يلي عمل هالـ Quiz, طب مين يلي عملو؟ واحد زيك زيو!!

يزيد

فينا ولا فيهم؟

أنا قصتي قصة مع الأغاني العربية, أول إشي أنا بسمع أغاني أجنبي أكتر من العربي, بس شو يلي خلاني أعمل هيك؟ و شو يلي خلاني ما أحس إشي لما اسمع أغنية عربية..

صار الواحد لما يسمع أغنية عربية ما يلاقي فيها آلات موسيقية كلة عالكمبيوتر, و تكنو والصوت معدل... الأغنية على طبقة وحدة و إزا قلب الطبقة بنشز... الكلمات أتفه من هيك ما بتلاقي, مغنيين على قفا مين يشيل, إزا كانت الأغنية باللبناني و بدو يزبط القافية الكاتب بيدخيلو كم كلمة مصري إنو كيف ما بتعرف و بيجوز يدخل عربي فصحى كمان.

بكون قاعد مع صحابي, و حاطين عالراديو , ما بتلاقي إلا واحد نط بحكيلك: خلي, خلي خلي... هاي حلوة الأغنية... طبعا بتكون الكلمات إشي مسخرة, فإنو بسأله شو عاجبو فيها, فا بحكيلي إنو بعرف إنها مسخرة الأغنية بس حلو الواحد يسمعها, و أنا هاي ما دخلت بمخي, كيف مسخرة و حلوة؟ هلأ أنا لقيت شو المشكلة عنا... إحنا بنسمع الأغاني مرة و مرتين و ثلاث مرات الواحد عالمرة الرابعة بيصير يغني مع الأغنية... شوية ولا بيصير يحبها... و بعد شوي بيقتنع إنو الأغنية إبداع, شريط عمر دياب الجديد هو أحسن مثال للي بحكي عليه...

أنا ما بنتقد كل الأغناني العربية لأنه أنا بسمع كثير شغلات... مثلا لما صاحبي حط أغنية طوق الياسمين لماجدة الرومي أو أغنية ممنوعة أنت أو يا لور حبك أو...أو... و ألف أو بس وين راحو هدول الناس؟ وين راح الفن الراقي... الناس بطلت بدها هيك شغلات... عشان هيك كاظم نزل أغاني "فايعة" عشان الناس ترضى... نزل من مستوى... فالعيب مش بالفنانين العيب فينا...

لينا شماميان فنانة رائعة صوت جميل جدا... بس ليه ما بنشوفها عالتلفزيون؟ أو البوسترات معبية البلد فيها؟ لأنو هيك إحنا بدنا... وبتطلعلك وحدة بتحكيلك إسمع بس إسمع...أي و الله ما حدا سامع إلا إلك...

يزيد

شعب فاضي ما في عندو وقت...

كل يوم الواحد بيفتح الإيميل تاعو إلا ما يلاقي إيميلات تاعون بالله عليك تبعتها لـ 150 واحد وإلا حلت عليك لعنت الأجداد, هلا السؤال هو... يلي بعتلي هادا الإشي قرأ عنو؟ أو تأكد من صحة الإشي يلي في؟ ما أعتقد... و غير هيك بتشوف Posts علـ Facebook ما بعرف فيها غير ربك.

فا بيوم من الأيام بفوت عالـ Facebook تاعي بلاقي فيديو معمولو بوست إسمو "امرأة ماتت وهي تعرض الصور الكاريكاتورية المسيئة للرسول" و تحت الفيديو الله أكبر و فداك يا رسول الله... الخ طبعاً أنا إنو "إيه" شو بتقول!, الفيديو عبارة عن مذيعة بتقرأ شغلة ببرنامج, ما حدا فاهم شو اللغة يللي بتحكي فيها, و وقعت عالأرض... طبعا المحللين العرب المسلمين المثقفين عين الله عليهم عالسريع عملو هالفيديو و جهزو حالهم و همة مش فاهمين الموضوع كله, حكولك مذيعه و ما حدا فاهم شو بتحكي و ولا حدا مدقق... خلص بنمشيها و بنضحك على أكم واحد...

أنا من النوع يللي إذا شفت شغلة مش مقنعة عالسريع Google it و بعد التدوير و اللفلفة قدرت أعرف إسم المذيعة و دور دور يا معلم... طلعت صربية, طب ما همة حكو دنيماركية... ستنا شوي, طلعت مش ميتة... طُب طلع البرنامج مسابقات... إنو شو بالنسبة...

فرجعت بعد ما خلصت لقيت كمان تنين من صحابي عملو بوست للفيديو و بلشت أقرأ بالتعليقات و أضحك... بعدين صابتني حالة مش عارف كيف... إنو لما الواحد يصير يسأل حالو أسئلة... كان من هالأسئلة...

ليش إحنا شعب سلبي و كل إشي بصير بالدنيا بيكون ضدنا؟

ليش إحنا ما بنعرف بإشي إسمو مرجع لكل إشي بنقرئه أو بنشوفو؟

ليش ... و ليش... وأكتر من ليش...

جاوبني صوت جواتي قلي... إحنا شعب فاضي ما عنا وقت...

http://www.facebook.com/video/video.php?v=1053125456384&ref=share