June 25, 2010

... حلم مواطن

أضرب أكثر من نصف سكان المملكة بسبب رفع أسعار البنزين قرش واحد, و أصبحت المواصلات وسيلتهم للتنقل داخل المملكة و فضّل البعض ركوب الدراجات الهوائية على أن يُستغل من قبل الحكومة, أما من جهة أخرى استقال مدير عام الجمارك بعد أن سمع بخبر فرض ضرائب على السيارات الهجينة, و أضرب عدد من التجار في المنطقة الحرّة إحتجاجاً على فرض ضريبة قيمتها 50% على هذه السيارات الصديقة للبيئة ونظّم هذه الإضراب وزير البيئة الأردنية …

على صعيد آخر, تزامن قرار رفع الأسعار و فرض الضرائب على سلع كثيرة كالقهوة و رفع تعرفة الكهرباء و المياه مع الحدث العالمي الذي ينتظره الملايين كأس العالم, فشعر المواطن الأردني بإستغباء الحكومة لتفكيره وطالب بإقالة الحكومة الحالية… هذا و أيضاً قاطع المواطنون شركات الإتصالات بعد فرض ضريبة تلو الضريبة على بطاقات الشحن التي يدفعها المواطن بدلاً من أن يتم إقتطاعها من أرباح هذه الشركات...

أطلقت جمعية حماية المستهلك حملات توعية للمواطنيين وتعريفهم بحقوقهم و …

صحي السيد مواطن من النوم على خبر رفع الدعم عن بعض المنتجات و فرض ضريبة على البنزين, فراح و لحق حالو و إشترا 10 كيلو قهوة و 15 كروز دخان و فلل السيارة...

ورجع نام و هوه مبسوط و ضاحك عالحكومة....

و يلي بيحكي كلمة وحدة عن حكومتنا هادا واحد ما بيفهم, لإنه حكومتنا من أكثر الحكومات ذكاء, و عارفة يلي بتعمله...
عارفة إنه لو رفعو السعر للسما ما حدا رح يعترض...
عارفة إنه أيا حدا رح ينتقدها رح يطلق عليه لقب "غير الوطني"
عارفة إنّا شعب ناقَض نظرية علمية (لكل فعل رد فعل)
بس مش عارفة إنه بيوم ... رح ينفجر إشي... يا إما المواطن... يا إما الخزينة قد ما لمّو مصاري...

May 31, 2010

تخدير


أنا منّي و علي تخدرت بصراحة…

كل إشي صار عادي, ناشطين البيئة و حماية الموارد الطبيعية عفّنو, ناشطين المحافظة على الثروة الحيوانية صابهم أنفلونزا الحيوانات كلها, ناشطين حقوق الإنسان عم بيموتو.

ما حدا بسمع… ما حدا بيشوف… بس في حدا بيحكي… و لاحظو شو بيحكي…

في تقرير لموقع الجزيرة عن ردود الفعل للدول على مجزرة قافلة الحرية مع بعض التعديلات مني عشان تنفهم أكثر:

إسماعيل هنية يتصل بأمير قطر, و محمود عباس يطالب الأمم المتحدة بالوقوف في وجه إسرائيل أما محمد بركة و جمال زحالقة يحملان رئيس الوزراء الإسرائيلي ووزير الدفاع مسؤولية المجزرة!!!... على صعيد آخر الأردن يستدعي السفير الإسرائيلي ولبنان من جهتها تدين الإعتداء أما سوريا كالعادة تطالب بإجتماع عاجل لجامعة الدول العربية. ووصف امير قطر الإعتداء على الأسطول بـ (الغير إنساني!!!!) أما مصر بمواقفها المحبوبة عربياً و عالمياً تدين و تستدعي السفير الإسرائيلي على العشاء, و السودان خليهم بحالهم الله يعينهم, اليمن تصطف مع مصر و لبنان و جامعة الدول العربية وتدين وتشجب و تستنكر الأفعال الصهيونية الغير إنسانية البنت الكلب...و عمرو موسى من جهته قلك ليش يكتب خطاب جديد فأعاد الخطاب تاع حرب غزة...

بس مشالله عليهم صارو يوزعوها بينهم, إشي بيندد إشي بيدين إشي بستدعي السفير عالعشا إشي عالغدا عشان الشعب ما يزهق, يا جماعة خدّرتونا... نفسي صار أسمع ايا إشي جديد, نفس الحكي نفس الحكي و مجلس الأمن و الأمم المتحدة و جامعة الدول العربية بحكي يفرطوهم مبدئياً, أنا محاسب وبعرف إسمعو مني كلها تكاليف زيادة إفرطوها! و أفرطو معا القانون الدولي, ولا ليش تفرطو ؟ ما هو فارط... و أنا عم بكتب بهالمقال 19 واحد مات...
19 مش رقم...
19 روح...
19 حياة...
19 مستقبل...
19 إنسان...

لازم نرجع و نقرأ الخبر مرتين... أول مرة عشان نعرف شو عم بيصير... ثاني مرة نفكر بالأرقام... نحاول نطلع من مرحلة التخدير و نقنع حالنا إنهم بشر...

شكراً لتركيا ذكرتنا إنه في حصار لسه على غزة...


May 16, 2010

الزواج التقليدي

واحد من أكثر المواضيع إستفزاز بمجتمعنا بالنسبة إلي بعد الثقافة الموسيقية هو موضوع الزواج التقليدي, يلي مش عارف كيف بنت بتقبل عحالها تكون بموقع بوكسة فقوس مع إحترامي لكل البنات يلي تجوزو بهالطريقة, و تخلي واحد يجي يطلع عليها و يفحص و ينقي…

و مش عارف عن الشب يلي لا بيكون بعرفها ولا عمره شايفها ولا بيعرف إهتماماتها لهل بنت كيف بده يقضّي معها كل حياته, قال والله رحنا و شفناها مشالله عليها جمال و أدب و أخلاق!!! طب ما أنا لو رحت أخطب هيفا وهبي رح تقلب شريفة مكة بالبيت…

السيناريو الأول: إنه الشب بده يخطب صاحبته, فبيجي على أهله و بيحكيلهم, طبعا أول جواب رح ينحكاله "هيه صاحبتك يعني كانت مصاحبة غيرك" و بيبلشو يشككو بالبنت و همه مش عارفينها, طب برأيكم شو الأحسن؟ تتجوز وحدة إنتا مصاحبها و عارف شخصيتها… ولا وحدة رحت عندها 3 أيام و بعدها سألت عنها الجيران و أهلها و حكولك إنها منيحةّ!!! شو بيضمنلك بهاي البنت! ولا عشان أهلها محترمين لازم تكون محترمة؟ ياما كان لكل عيلة بلوعة… ممكن تكون هيه هالبلوعة.

السيناريو الثاني: البنت مصاحبة الشب, و همه تقريباّ قد بعض و الشب بيبني بحاله لسه… و تيجي عليه البنت تحكيله أنا كل يوم عم بيجيني عرسان عالبيت و مش قادر أشرح لأهلي الموضوع! هون بتصير هاي العلاقة ضحية عاداتنا, البنت ما بتقدر تروح على أهلها و تحكيلهم هيك هيك هيك لإنه يا إما بتروح فيها طخ, 
يا بيجوزوها إبن عمها عالبدري, يا إما إذا كانو كثيييير منفتحين بيحكولها جيبي بكرا يخطبك… طبعا الشب بيكون لسا يدوب بلش يشتغل و بيسكر عالموضوع…

 السطحية: بحس عنا كثير سطحية بالتعامل مع أمور الزواج… من ناحية البنت إنه لازم الخطبة و العرس بأحسن فندق و عشا و شهر عسل بكوالا لمبور و شقة بدير غبار مطلّه عالبحر الميت و أهم أهم أهم أهم إشي المهر!! هادا يلي يتثبت في ذاتها… يعني مش حلوة تتطلع بالرخيص, يعني ما بتطلع بأقل من 9! موديل سنتها البنت شو بتحكي إنتا! طب ما هوه يا بنتي رح يتشحطط تيجيب المصاري و يشحططك معه, هيه بتكون ناسية إنها تجوزته و رح تعيش معا؟؟؟ و الشب طبعاّ السطحية تاعته على أسخم... بيكون بيدور عالشكل الأخ و إذا بترد عليه ولا لأ و إذا إمه بتحبها.

سن الزواج: سن الزواج أنا برأيي للمرأة من 24-100 ما في إشي بقاموسي إسمه عانس, بمجتمعنا نسبة العنوسة عاليه زي ما بيكتبو بالجرايد… عنّا بالأردن العانس هيه يلي صار عمرها 26!! و ببعض المناطق 24 عانس… فغصبن عنها بدها تكون نسبة عالية مع الأزمة الإقتصادية, يلي الشب بيكون عم بيفكر كيف بده يغطي مصاريف الخطبة و العرس و المهر و البيت  و و و و…. فبيحكيلك ليش أجيب لحالي الهم؟ هينا عايشين…

الطلاق: نسبة الطلاق عنا بإرتفاع مستمر و طبعا بما إنه الواحده متجوزة عشان المصاري و نكبته للزلمه رح تفرط الشغلة… أو هوه من سطحيتة ماخدها على شكلها أكيد كمان ما بيكملو…

بالنهاية الموضوع كالتالي:
-         المفروض: لقاء , إعجاب, حب, خطبة, زواج.
-         الواقع     : لقاء, خطبة, إعجاب, زواج, و عاد الحب إنتا و حظك!

فكيف بنتوقع حياه زوجية ثابتة إذا أهم عنصر مش موجود فيها؟

March 30, 2010

صحيح إني خروف

اليوم قلت يا زلمة روح إتبعزق و إسلخها بكوفي شوب من الآخر و أرجل أرجيلة تمام بلاش قهوة منا و فينا اليوم و المصاري وسخ إيدين والواحد ما بيعيشش إلا مرة ومن هالحكي… رحت طلعت أنا وصاحبي على الكوفي شوب الفلاني بجبل عمان تحديدا, إجا الشب و تفضلو و مش عارف شو وشو بتحبو تشربو…الأرجيلة بـ 4 دنانير قلناله بس بدنا أرجيلتين وسلامتك, و كل واحد طلع الابتوب تاعو و قعدنا و جابولنا شغلات و بوشار و بحكيلنا هدول ضيافة فإنه الله يزيد فضلك…
خلصنا وإنبسطنا ولعبنا و بدنا نروح… الحساب يا معلم… 15.20 دينار…

صاحبي الله ستر لحقنا بكلونيا لَصحي… سبحان يلي خلى ال 8 دنانير 15 أي والله لو إنهم بيبيضو! ناديت البنت يلي هناك بحكيلها إشرحيلي شو هاد بالزبط… فحكتلي ما هو في 3 cover charge فإنه انا اه صح... و عم بدفع و أنا مش مقتنع... عشو الـ Cover Charge  بالزبط؟؟ و يا سيدي 3 دنانير هيك الباقي شو؟؟ 10%  Service Charge و 16% ضريبة مبيعات... أحا

يعني نصب عيني عينك! نفسي أدخل بحياتي كوفي شوب ما أنصدم بالفاتورة تاعتو و أحسها واقعية, و ليش ما تنكتب الأسعار عالـ Menu و تكون صح؟ ولا بعد ما يوقع الفاس بالراس وتتعكم؟ يعني الواحد بدو يتلقاها من وين ولا من وين؟؟؟ من شركات الإتصلات ولا من الحكومة ولا من الضرايب ولا من جرار الغاز ولا من الكوفي شوبات؟ معقولة يعني إذا بدي أطلع على محل و أأرجل في أدفع سبع دنانير و نص!!! يعني عفوا من المحل بس والله لو إني مأرجل أرجيلة فيتامين سي و الفحم توصايه من المريخ و الطلة تاعت المحل من القمر على الارض  ما بدفع هيك... 

February 27, 2010

!!! بكره الشتا

سألت كثير ناس عن رأيهم بالشتا و إنه إذا بيحبو ولا لأ, فكانت معظم الأجوبة من البنات إنه يااي شو إنه الشتا بيجنن و حلو وكتيييييييييير رومنسي… بسأل الشباب بيروح فاقعلك Pause شيوخي و بيقلك المطر خير يا إبني... بس أنا مش شايف إنه حلو ولا بيجنن ولا رومنسي و عارف إنه خير و زرع و مش عارف شو... بس هل إحنا حكومتنا (الله يخليها بلا ما يزعلو) مجهزه شوارعنا لهل شتا؟ أنا أول إشي بشوفه بالشتا الشوارع الغرقانة و الزفتة يلي قبعت من محلها و التصريف اللي زي العما و السيارات يلي على جنب الشارع و حوادث... مبارح تخيلو نفق سيارات مسكّر و معبا مي, يعني بالمختصر نفق ما في تصريف...

أنا من خريجين الجامعة الهاشمية فيعني لما أروح عالجامعة كنت أفوت إشي إسمه رغدان, وما أدراك ما رغدان بالشتا... أكبر تجمع للطينة و القرف و زيت محركات الباصات... بتوصل هناك على شكل بني آدم و بعدين بدك تشمر هالبنطلون عشان تستعد للغوص في معركة ركوب الباص (عالواقف طبعاً) هاد بيدفش من هون على طرطشة باص خيانه* من الخلف على زواريب مياه من الزينكو يلي فوقك بتوصل الجامعة على شكل جندي طالع من الحرب... طبعا هاد كله غير التكاسي يلي بيكون ينقي الركاب تنقايه و إنتا و حظك عاد....

و برجع للبنات يلي بيشوفو الشتا رومنسي إنه يعني شو الرومنسية إنك تطلع بالشتا و تنبلّ و تتطرطش و طيّن و بس تفكر ترجع على سيارتك تطفي... غير الكاّبة النفسية تاعت الجو العام... و خذلك عاد واحده من هال ناس يلي بيكونو حبيبه بالشتا حبيبها يتركها... و تحط أغنية حبيتك بالصيف... نطرتك بالشتا... أي حتى فيروز كانت عارفة إنه رح يتركها بالشتا... وبس خلص فشيت غلي...

* باص خيانة هوه باص بيعبي الطلاب عالواقف و القاعد بدون ما يعبي ركاب من الدور و دايماً بيجي غدر.

January 19, 2010

مكالمة دولية


أول إشي بتأسف إني طولت لأكتب عالمدونة لإنو بعيد عنكم حضرتي محاسب و بتعرفو شو الوضع أول السنة... :P كثير شغلات صارت حواليه من تغيرات زي مثلاً ضم المواقع الإلكترونية لقانون الطبع و المنشورات تحت شعار "إخرس يا شعب" بس أنا لسا مصر إنّا عنّا حرية تعبير ورأي طول ما أحنا عم نحكي الإشي الصح و بعيدعن القدح و الذم الخاطئ...

موضوعي اليوم عن الشوفير تاع الشركة عنّا يلي تخالف مخالفة سير لإنو عم بيحكي تيليفون, إجا علي بيحكيلي حجزولي الرخص لإني بحكي تيليفون, طبعا أنا إنو وحّد الله يا زلمه! على تيليفون يحجزولك الرخص؟! حكالي إنهم عاملين حملة قال... المهم من هون لهون اليوم الثاني بيجي علي بيحكيلي دفعت 65 دينار عشان أدفع المخالفة و أرجع الرخص... طبعا أنا لهون و قبّعت معي!!! كيف و ليش و إستحالة ومن هالحكي لبين ما طلّع الوصل يلي دفعه للأمانة (الله يخليلنا إياها) و يلي شايفينه...

التهم : إستخدام السائق الهاتف أثناء السوق وكان الهاتف أو جزء منه محمول.
الغرامة: خمسة و ستون دينار ينطح دينار والدفع خاوة فقط لا غير

65 دينار على تيليفون... يعني (الله يفقهم) تحت أيا قانون أو أيا بند سلخو هالزلمة 65؟ تحت بند حملات لم مصاري من الشعب؟ ولا تحت بند "إخرس يا شعب بنعمل يلي بدنا ايا"؟

القصة إنو بحكيلو طب شو بدك تسوي هسه؟ بدك تعترض ولا بدك تعملك شغله؟ حكالي يا زلمة انا الشغل فوق راسي وين بدي أقعد أعترض و أسخّم إذا بدي أطارد ورا 65 دينار من دائرة السير رح أدفع قدهم إجازات.. فليش الغلبه؟

فعلا ليش الغلبة؟

و بعدين قعد يحكيلي عن شرطي هناك عم بيحكي لزميله "يلاااا يا زلمة عجِّل!! خَلَص النهار بدنا نترزَّق!!" إشي بصراحة يعني بيفتح النفس!شكلهم بيعطو عمولة!!قال والله نزل البونص هاي السنة دفاتر مخالفات...

 لكل يلي ما بيعرف قديش مخالفة التحدث بالهاتف بحب أحكيلو أنها 15 دينار بس شكلو صاحبنا كاين يحكي دولي... 

January 8, 2010

فتح و حماس, ضفة غربية و غزة



يعني إنو شو قصة فتح و حماس, أيام الحرب على غزة ما بتسمع إلا فتح و حماس و بتسمع كنت ضفة غربية و غزة مع العلم إنو الضفة الغربية مكانها بشرق فلسطين بس سموها الضفة الغربية عشان تعرفوا إنو هون بتنتهي فلسطين يعني إنسو عكا و حيفا ويافا هدول مش إلكم, وإنتو إعترفتو بهادا الشي بتسمية ضفتكم الشرقية غربية, كان نفسي أسمع كلمة فلسطين طول الحرب حتى بالمظاهرات (فداكِ يا غزة) الإنقسام صار و صار و تغلغل فينا كمان و إحنا مش حاسيين…
أنا لا مع فتح ولا مع حماس الله ينعن أبو اللي جابهم التنين, بس لما صارت الحرب الأخيرة على غزة أنا أكيد كنت مع حماس لإنو شو ما صار هدول فلسطينية و عرب و مسلمين, ما باجي بحكي والله هدول حماس همه جابو لحالهم الحرب هاي زي واحد مصري هادا رأيه كان, إستفزني لدرجة إني شطبتو من الفيسبوك تاعي, لإنو واحد زييو الحكومة بس بدها إيا يضل يحكي هيك عشان يزيد الإنقسام أكثر و أكثر ويخلينا نفكر إنو كل الشعب المصري هيك عن طريق حملاتهم عالفيسبوك…
بعدها صارت قصة غولدستون و فضيحة السلطة الفلسطينية , طب وين الإشي الجديد بإنه السلطة الفلسطينية متواطئة مع إسرائيل و أمريكا مهوه أختي الزغيرة لما تشوف عباس بتحكي عنو عميل, بس إحنا بنحب نلت و نعجن بالحكي كثير عشان نكبر الموضوع, حجاج بجريدة الغد ما خلى إشي إلى رسمه عن الخلاف الفلسطيني الفلسطيني ويعيد ويزيد! طب خلاص فهمنا!!
بالآخر بحضر فيديو عامليته حماس و حاطينه على قناة الأقصى حاطيين في واحد من السلطة الفلسطينية عم بيجاوب على أسئلة جندي إسرائيلي بطريقة كتير بتقهر و بالآخر بيمسح طاقيته يلي بيكون عليها علم فلسطين بجزمة الجندي خلاني أكره حماس و فتح أكثر و أكثر…