الزواج التقليدي

واحد من أكثر المواضيع إستفزاز بمجتمعنا بالنسبة إلي بعد الثقافة الموسيقية هو موضوع الزواج التقليدي, يلي مش عارف كيف بنت بتقبل عحالها تكون بموقع بوكسة فقوس مع إحترامي لكل البنات يلي تجوزو بهالطريقة, و تخلي واحد يجي يطلع عليها و يفحص و ينقي…

و مش عارف عن الشب يلي لا بيكون بعرفها ولا عمره شايفها ولا بيعرف إهتماماتها لهل بنت كيف بده يقضّي معها كل حياته, قال والله رحنا و شفناها مشالله عليها جمال و أدب و أخلاق!!! طب ما أنا لو رحت أخطب هيفا وهبي رح تقلب شريفة مكة بالبيت…

السيناريو الأول: إنه الشب بده يخطب صاحبته, فبيجي على أهله و بيحكيلهم, طبعا أول جواب رح ينحكاله "هيه صاحبتك يعني كانت مصاحبة غيرك" و بيبلشو يشككو بالبنت و همه مش عارفينها, طب برأيكم شو الأحسن؟ تتجوز وحدة إنتا مصاحبها و عارف شخصيتها… ولا وحدة رحت عندها 3 أيام و بعدها سألت عنها الجيران و أهلها و حكولك إنها منيحةّ!!! شو بيضمنلك بهاي البنت! ولا عشان أهلها محترمين لازم تكون محترمة؟ ياما كان لكل عيلة بلوعة… ممكن تكون هيه هالبلوعة.

السيناريو الثاني: البنت مصاحبة الشب, و همه تقريباّ قد بعض و الشب بيبني بحاله لسه… و تيجي عليه البنت تحكيله أنا كل يوم عم بيجيني عرسان عالبيت و مش قادر أشرح لأهلي الموضوع! هون بتصير هاي العلاقة ضحية عاداتنا, البنت ما بتقدر تروح على أهلها و تحكيلهم هيك هيك هيك لإنه يا إما بتروح فيها طخ, 
يا بيجوزوها إبن عمها عالبدري, يا إما إذا كانو كثيييير منفتحين بيحكولها جيبي بكرا يخطبك… طبعا الشب بيكون لسا يدوب بلش يشتغل و بيسكر عالموضوع…

 السطحية: بحس عنا كثير سطحية بالتعامل مع أمور الزواج… من ناحية البنت إنه لازم الخطبة و العرس بأحسن فندق و عشا و شهر عسل بكوالا لمبور و شقة بدير غبار مطلّه عالبحر الميت و أهم أهم أهم أهم إشي المهر!! هادا يلي يتثبت في ذاتها… يعني مش حلوة تتطلع بالرخيص, يعني ما بتطلع بأقل من 9! موديل سنتها البنت شو بتحكي إنتا! طب ما هوه يا بنتي رح يتشحطط تيجيب المصاري و يشحططك معه, هيه بتكون ناسية إنها تجوزته و رح تعيش معا؟؟؟ و الشب طبعاّ السطحية تاعته على أسخم... بيكون بيدور عالشكل الأخ و إذا بترد عليه ولا لأ و إذا إمه بتحبها.

سن الزواج: سن الزواج أنا برأيي للمرأة من 24-100 ما في إشي بقاموسي إسمه عانس, بمجتمعنا نسبة العنوسة عاليه زي ما بيكتبو بالجرايد… عنّا بالأردن العانس هيه يلي صار عمرها 26!! و ببعض المناطق 24 عانس… فغصبن عنها بدها تكون نسبة عالية مع الأزمة الإقتصادية, يلي الشب بيكون عم بيفكر كيف بده يغطي مصاريف الخطبة و العرس و المهر و البيت  و و و و…. فبيحكيلك ليش أجيب لحالي الهم؟ هينا عايشين…

الطلاق: نسبة الطلاق عنا بإرتفاع مستمر و طبعا بما إنه الواحده متجوزة عشان المصاري و نكبته للزلمه رح تفرط الشغلة… أو هوه من سطحيتة ماخدها على شكلها أكيد كمان ما بيكملو…

بالنهاية الموضوع كالتالي:

-         المفروض: لقاء , إعجاب, حب, خطبة, زواج.

-         الواقع     : لقاء, خطبة, إعجاب, زواج, و عاد الحب إنتا و حظك!

فكيف بنتوقع حياه زوجية ثابتة إذا أهم عنصر مش موجود فيها؟

صحيح إني خروف

اليوم قلت يا زلمة روح إتبعزق و إسلخها بكوفي شوب من الآخر و أرجل أرجيلة تمام بلاش قهوة منا و فينا اليوم و المصاري وسخ إيدين والواحد ما بيعيشش إلا مرة ومن هالحكي… رحت طلعت أنا وصاحبي على الكوفي شوب الفلاني بجبل عمان تحديدا, إجا الشب و تفضلو و مش عارف شو وشو بتحبو تشربو…الأرجيلة بـ 4 دنانير قلناله بس بدنا أرجيلتين وسلامتك, و كل واحد طلع الابتوب تاعو و قعدنا و جابولنا شغلات و بوشار و بحكيلنا هدول ضيافة فإنه الله يزيد فضلك…

خلصنا وإنبسطنا ولعبنا و بدنا نروح… الحساب يا معلم… 15.20 دينار…

صاحبي الله ستر لحقنا بكلونيا لَصحي… سبحان يلي خلى ال 8 دنانير 15 أي والله لو إنهم بيبيضو! ناديت البنت يلي هناك بحكيلها إشرحيلي شو هاد بالزبط… فحكتلي ما هو في 3 cover charge فإنه انا اه صح... و عم بدفع و أنا مش مقتنع... عشو الـ Cover Charge  بالزبط؟؟ و يا سيدي 3 دنانير هيك الباقي شو؟؟ 10%  Service Charge و 16% ضريبة مبيعات... أحا

يعني نصب عيني عينك! نفسي أدخل بحياتي كوفي شوب ما أنصدم بالفاتورة تاعتو و أحسها واقعية, و ليش ما تنكتب الأسعار عالـ Menu و تكون صح؟ ولا بعد ما يوقع الفاس بالراس وتتعكم؟ يعني الواحد بدو يتلقاها من وين ولا من وين؟؟؟ من شركات الإتصلات ولا من الحكومة ولا من الضرايب ولا من جرار الغاز ولا من الكوفي شوبات؟ معقولة يعني إذا بدي أطلع على محل و أأرجل في أدفع سبع دنانير و نص!!! يعني عفوا من المحل بس والله لو إني مأرجل أرجيلة فيتامين سي و الفحم توصايه من المريخ و الطلة تاعت المحل من القمر على الارض  ما بدفع هيك... 

!!! بكره الشتا

سألت كثير ناس عن رأيهم بالشتا و إنه إذا بيحبو ولا لأ, فكانت معظم الأجوبة من البنات إنه يااي شو إنه الشتا بيجنن و حلو وكتيييييييييير رومنسي… بسأل الشباب بيروح فاقعلك Pause شيوخي و بيقلك المطر خير يا إبني... بس أنا مش شايف إنه حلو ولا بيجنن ولا رومنسي و عارف إنه خير و زرع و مش عارف شو... بس هل إحنا حكومتنا (الله يخليها بلا ما يزعلو) مجهزه شوارعنا لهل شتا؟ أنا أول إشي بشوفه بالشتا الشوارع الغرقانة و الزفتة يلي قبعت من محلها و التصريف اللي زي العما و السيارات يلي على جنب الشارع و حوادث... مبارح تخيلو نفق سيارات مسكّر و معبا مي, يعني بالمختصر نفق ما في تصريف...

أنا من خريجين الجامعة الهاشمية فيعني لما أروح عالجامعة كنت أفوت إشي إسمه رغدان, وما أدراك ما رغدان بالشتا... أكبر تجمع للطينة و القرف و زيت محركات الباصات... بتوصل هناك على شكل بني آدم و بعدين بدك تشمر هالبنطلون عشان تستعد للغوص في معركة ركوب الباص (عالواقف طبعاً) هاد بيدفش من هون على طرطشة باص خيانه* من الخلف على زواريب مياه من الزينكو يلي فوقك بتوصل الجامعة على شكل جندي طالع من الحرب... طبعا هاد كله غير التكاسي يلي بيكون ينقي الركاب تنقايه و إنتا و حظك عاد....

و برجع للبنات يلي بيشوفو الشتا رومنسي إنه يعني شو الرومنسية إنك تطلع بالشتا و تنبلّ و تتطرطش و طيّن و بس تفكر ترجع على سيارتك تطفي... غير الكاّبة النفسية تاعت الجو العام... و خذلك عاد واحده من هال ناس يلي بيكونو حبيبه بالشتا حبيبها يتركها... و تحط أغنية حبيتك بالصيف... نطرتك بالشتا... أي حتى فيروز كانت عارفة إنه رح يتركها بالشتا... وبس خلص فشيت غلي...

* باص خيانة هوه باص بيعبي الطلاب عالواقف و القاعد بدون ما يعبي ركاب من الدور و دايماً بيجي غدر.

مكالمة دولية

أول إشي بتأسف إني طولت لأكتب عالمدونة لإنو بعيد عنكم حضرتي محاسب و بتعرفو شو الوضع أول السنة... :P كثير شغلات صارت حواليه من تغيرات زي مثلاً ضم المواقع الإلكترونية لقانون الطبع و المنشورات تحت شعار "إخرس يا شعب" بس أنا لسا مصر إنّا عنّا حرية تعبير ورأي طول ما أحنا عم نحكي الإشي الصح و بعيدعن القدح و الذم الخاطئ...

موضوعي اليوم عن الشوفير تاع الشركة عنّا يلي تخالف مخالفة سير لإنو عم بيحكي تيليفون, إجا علي بيحكيلي حجزولي الرخص لإني بحكي تيليفون, طبعا أنا إنو وحّد الله يا زلمه! على تيليفون يحجزولك الرخص؟! حكالي إنهم عاملين حملة قال... المهم من هون لهون اليوم الثاني بيجي علي بيحكيلي دفعت 65 دينار عشان أدفع المخالفة و أرجع الرخص... طبعا أنا لهون و قبّعت معي!!! كيف و ليش و إستحالة ومن هالحكي لبين ما طلّع الوصل يلي دفعه للأمانة (الله يخليلنا إياها) و يلي شايفينه...

التهم : إستخدام السائق الهاتف أثناء السوق وكان الهاتف أو جزء منه محمول.

الغرامة: خمسة و ستون دينار ينطح دينار والدفع خاوة فقط لا غير

65 دينار على تيليفون... يعني (الله يفقهم) تحت أيا قانون أو أيا بند سلخو هالزلمة 65؟ تحت بند حملات لم مصاري من الشعب؟ ولا تحت بند "إخرس يا شعب بنعمل يلي بدنا ايا"؟

القصة إنو بحكيلو طب شو بدك تسوي هسه؟ بدك تعترض ولا بدك تعملك شغله؟ حكالي يا زلمة انا الشغل فوق راسي وين بدي أقعد أعترض و أسخّم إذا بدي أطارد ورا 65 دينار من دائرة السير رح أدفع قدهم إجازات.. فليش الغلبه؟

فعلا ليش الغلبة؟

و بعدين قعد يحكيلي عن شرطي هناك عم بيحكي لزميله "يلاااا يا زلمة عجِّل!! خَلَص النهار بدنا نترزَّق!!" إشي بصراحة يعني بيفتح النفس!شكلهم بيعطو عمولة!!قال والله نزل البونص هاي السنة دفاتر مخالفات...

 لكل يلي ما بيعرف قديش مخالفة التحدث بالهاتف بحب أحكيلو أنها 15 دينار بس شكلو صاحبنا كاين يحكي دولي... 

على راسي سيدي!

مبارح روّحت عالبيت المسا ولا أخوي بحكي معي بحكيلي روح إشتريلنا خبز, فإنو الواحد بيكون قرفان حالو و خبز!!! رحت طلعت عالمخبز يلي قدامو ألف سيارة... بس لفت إنتباهي باص واقف بالعرض مسكر على مصف لـ 3 سيارات الأخ... وقفت ورا و زمرت زمور عالخفيف عشان حرام بلكي سرحان... ما رد... رحت زمرت كمان مرة عالعالي برضو ما رد... ضليت أستنا بحضرتو لإنو بدي أصف! و صار في سيارات كمان وراي بدهم يصفو كمان, و الشب متنّح قلت هيه مطولة!! رحت سحبت حالي و صفيت بعيد شوي و مريت من جمبو بحكيلو "إنتا عارف على أكم مصف مسكّر؟" (بطريقة كثير منيحة) بحكيلي "و إنتا حضرتك بصفتك مين بتحكي معي؟" في إنو أنا "لا بس حبيت أحكيلك إذا كنت ناسي يعني" فلسه عم نحكي مرّت سيارة شرطة...

طااطاطاطا حررررك يا كيا!!!

الشب: على راسي سيدي...

طبعا أنا بس شفت هيك, عرفت إنّا شعب بنحب البهادل :D

دايما بناخدها شغلة شخصية إنو يعني لو رد عليّ بنقص من كرامته الأخ بس إذا الشرطي حكالو إنقلع يا تــــيــــت شيل سيارتك عادي بيكون هيك بكامل إنبساطو!!

فتذكرت فيديو فرجاني إيا صديقي عمر...

أشياء بكرهها بالـ Facebook

*بكل Event لازم تلاقي واحد كاتب "أسف أنا برّة البلاد" إنو يعني لو كان بالبلاد كان راح حضر...

*الناس يلي بتعمل Add as a friend وهوه أصلاً مش عارف مين هالشخص هاد! يحسهم بيكونو يدورو دوارة عالبنات وبس يشوف تعليق منها على شغلة طُب ولا بيعطيها Add بلكي شنّصت... زي ما كتبت Rula بمدونتها...

*البروفايلات يلي بتكون مشاع للعالم ما في أي نوع من أنواع الخصوصية... غير إنو أكثرهم بروفايلات بنات عاملينهم شباب عشان يا إما يلم Poker Chips أو لما يعمل Group يقدر يبعت دعوة لآلاف الناس... ولا يا حبيبي التعليقات على الصور تاعت هالبروفايلات الهش بشك... شغل كروت معايدة... بتقدرو تقرأو عنهم هون كمان

*كل واحد يعمل Group بدو الكل خاوة يفوت في... يعني صاحبي عمل Group و بدو إياني أفوت في و بعرف إني ما إلي دخل بهال مواضيع بس بحكيلي يا زلمة بس فوتو إنتا و ما عليك ... إنو إزا أنا دخلت بـ Group و ما فوتّو ولا مرة إنتا شو ستفدت من كل هالقصة!!

*من أكثر الشغلات يلي بتستفزني بالـ Facebook هيه الـ Quizzes ويلي كتبت عنها من قبل هون مش ضروري أحكي عنها, بس الشغلة الجديدة هيه الزفت الألعاب التافهة تاعت الـ Facebook واحد بزرع و بحصد الأخ و بيضيع 10 ساعات عهيك شغلة و الثاني بعمل مطعم و واحد شاغلّي حالو café تاعو يعني إشي مبشّر بالمستقبل... و حكيت بديش أطُب فيهم بس بشتغلو بالواحد يا يا يا يايا يزيد إفتح مطعم أو يا يا يا يا يايا يزيد كون جاري بالمزرعة!!! بعرضكم حلّو عني!!

*طبعا الناس يلي دايما الـ Status تاعتهم دمار نفسي وممزعين حالهم... أو الناس تعون حكمة اليوم بحس حالي مشترك بخدمة التليتكست...

*الـ Photo Tags يلي ما بيكون حدا فيها بس بيكون مكتوب "Describe me in one word" إنو بالله عليكم ما بتقدرو تكتبوها بالـ status الممله تاعتكم!! و بيوصلك 100 Email على 100 Notification...

*ليش الناس عالفيسبوك بيعملو Poke؟ لسه مش عارف وين المتعة أو الفائدة من الموضوع...

ووو بس...

جرائم الشرف بالأردن

مبارح كانت جريمة الشرف الـ 19 بالأردن من أول السنة لهلأ, طبعا هدول الـ 19 المعلن عنهم غير الحلات يلي بيتسترو الأهل عليها عشان الفضايح, ظاهرة "الشرف" صارت عم بتزيد و المسؤولين بحاولو يخلوها إنها حالات فردية و مش موجودة...

طبعا أنا برأيي أساس المشاكل هيه المواد 340 و 98 من قانون العقوبات الأردني يلي بما معناهم تتخفف العقوبة على  القاتل يلي إلها دخل بالشرف اذا مسك المجني عليها متلبسه بعلاقة جنسية غير مشروعة و القاتل كان بيقرب للضحية أو كان معصّب الأخ.... طبعاً أنا بحكي تخفيف يعني ممكن العقوبة تتخفف للنص إذا مش أكثر كمان, غير العيله يلي بتستخدم الحق الشخصي "الفيتو" عشان تستأنف الحكم و تطلب كمان تخفيف...

بالمقابل البنت يلي ممكن إنو ما تكون عاملة إشي بس الشك فيها خلاها عرضة إنها تموت من دون ما حدا ياخد حقها لا حكومة ولا أهل وطبعا أغلب الضحايا من جرائم الشرف بيكونو عذارى, أما الشب عين الله عليه بيروح و بحكي لصحابو شو سوّا و بيكون مكيف لإنو ما في عندو إشي يخاف منو...

يعني شو هوه شعور القاتل لما يقتل أختو؟ هل هوة بدافع الدين؟ أنا ما تعتقد الدين حكالنا أقتلو هيك... أعتقد إنو هاي عادات بمجتمعنا لازمها تغيير جذري... يعني مين إنتا تحكم على وحدة و تقتلها ؟! يا أخي مش عاجبيتك أو شاكك فيها قلعها برة البيت إذا ما بدك إياها... يلي هيه أختك يلي تربيت معها... بس تقتلها؟؟!!!

كل المقالات يلي كنت أقرأها عن جرائم الشرف كانت بتربط الوضع الإقتصادي بالموضوع, يعني نسبة جرائم الشرف عند الناس الفقراء بتكون أكثر من الناس الأغنياء بكثير... و أكيد الوضع الإقتصادي بأثر على التعليم, لإنو أكثر الفقرا بيضطرو يتركو دراستهم عشان يشتغلو و أغلب القاتلين بجرائم الشرف همه ناس مش متعلمين و مش متجوزين يعني ما في عندهم إشي يخسرو...

يا جماعة الموضوع زاد عن حدو وصار لازم يكون في توعية أكثر!

على كل حال هينا بنستنا بمجلس النواب الجديد, على الله يقدرو يعملولهم شغلة ويلغو هالمواد بالقانون.... أو على الله هالشعب يقدر يصوت ليلي إلو الحق بالكرسي مش لقرايبو و ولاد عشيرتو...

موسم الشرطة و المواطن

شو قصة الشرطة و المواطن مش طايقين بعض هاليومين؟ خلال شهر 5 مشاكل بين الشرطة و المواطنين أدت لوفاة ثنين و إصابة ثلاث! من متى المواطن صاير يحكي عللي بصير معو؟ ما هو طول عمرو بياكلها وعالساكت, ولا الصحافة مواسم ماشالله مرة بيدققو على حالات الإنتحار و مرة على المش عارف شو هاليومين شكلو موسم الشرطة و المواطن, وبديش أحكي من متى الشرطة عنا بتضرب لإنو طول عمرها بتضرب مش جديد.

المواطن يلّي مات من الضرب صار يعرف إنو في إلو حقوق, والشرطي لازم يعرف وين بتنتهي صلاحياتو, و ما في حدا فوق القانون, الشرطي إذا ضرب واحد و هوة بيعتقلو معناها إنو صار قاضي و حكم عليه إنو مذنب, لأ و مش بس حكم!... و نفذ الحكم كمان.

عالطرف الآخر المواطن, إبن العقيد الملازم الرقيب الركن من عشيرة بدنا عطوة, بدهم يبينو للشارع الأردني إنو ما حدا بخبطلهم على طرف, وبدهم جنازة يردحو فيها, وبينزلو هالشباب يكسرو الشارع و يحرقو و يسوو العجايب... لبين ما يستنكرو وجهاء القبيلة الأعمال الهمجية.

هيي قصة إنو الشعب صار واعي؟ ولا قصة إنو الشرطة أخدت عين عالمواطن؟ ولا قصة إنو الصحافة بتنشر هيك شغلات و بتعملها مواسم عنا؟ لسا مش عارف...


يزيد