September 9, 2009

في شوارع الأردن...





شوفير تكسي رمى كاسة القهوة الصباحية من شباك السيارة... شباب بيوكلو وجبات خلصوا و رموها... بنت طالعة مستعجلة عالجامعة شحنت الموبايل عشان تحكي مع حبيبها و رمت الكرت عالأرض... بس كل هالشغلات بتهون لما تشوف ولد صغير بيعيّط و حامل حبة بوظة بدو إمو تفتحلو اياها... والأم بتفتحلو إياها و بترمي الورقة عالأرض... يعني أنا كنت مفكر إنو رح نوصل لجيل ينهي الظاهرة السيئة عنّا... بس طول ما الجيل يلي بعدنا عم بنربي إحنا... عمرنا ما رح نصير...
كنت بحكي مع صديقي إني رح أكتب عن هادا الموضوع, فكان جوابو إنو الحكومه مش موفرة الحاويات في كل مكان... أنا رح أرد عليه إنو لهسا أنا بتذكر سلات الزباله يلي الأمانة ركبتهم عنا بالحارة و الولاد كسروهم و خربوهم... غير هيك عامل النظافة هو يلي رح يشيل زبالتك لما ترميها جكر بالحكومة,أي والله عامل النظافة يلي عنا بالحارة من كتر ما بيجي و بيروح انهلك, القصه بطلت قصة حكومة و شعب القصة صارت قصة عقلية فينا, إنقلبت الموازين لازم نرمي عالأرض و يلي بيروح يرمي بالحاوية هوه الشاذ فينا, لأ و في شباب بتكون مستحية تروح تكب الزبالة بالحاوية بلا ما الشباب يتخوتوا عليه, وبعدين بطلعلك واحد نغش بحكيلك يا زلمة إرمي إرمي إنتا بالأردن, هو هيك كتيييير كوووول! وبعديها بسلخ نغشة إرمي يا زلمة بلكي حطوا كمان زبالين و خفت البطاله,إنو شو بالنسبة! هاي بلدك! و إذا إنتا بلشت بحالك و الكل بلش بحالوا رح نوصل لشوارع نضيفة, مش بنوصل لهاي الشغله لما الحكومة تحط كميرات مراقبة "وهاد يلي صاير هسّا" بس ليش إحنا ما نغير حالنا؟ يعني الحكومة لو حطت كاميرات بكل مكان ما رح يتغير إشي!
طبعاً هادا الحكي غير عن المناطق السياحية يلي إشي بخزي زبالة فيها والإشي الوحيد يلي بضلوا معلق براس السياح لما ييجو عنا... غير طبعاً الرحلات يلي هيه المفروض تروح على مكان تغير جو في مش مكرهة صحية من الزباله يلي بنرميها... طبعا كلها كياس بلاستيك! و الكل بيعرف إنو البلاستيك ما بتحلل و كلو مواد سامّة, الدول المتقدمة طبعا بتستعمل كياس ورق بس إحنا على راسنا ريشه ما بنحب, ولما نروح على محل... بالله عمي بدي سائل جلي و بكيت شبس و علبة لبن كل وحدة بكيس عشان نطلع كسبانين من المحل, وهاي كمان خطوة لازم نعملها, ليش ما نستعمل كياس ورق؟...
طبعاً غير عن الناس يلي بيوصل الحاوية و بزت الزبالة جنبها... ويلي زبالتو على باب بيتو و بتكون الكياس مفتّحه و الزباله عالأرض! يعني الأمانة مش طالبة منك تعزل البلاستيك والمعادن والخبز والمش عارف شو عن بعض عشان يعملوا إعادة تصنيع للمواد! كل يلي طالبينو تحطها بطريقة منيحة قدام بيتك!
و بيجيلك بالآخر واحد بحكيلك عمان من أنضف العواصم العربية! يا سيدي على راسي وعيني بس حرام نكون من أنضف العواصم بالعالم؟
يزيد

8 comments:

  1. Thanx yazid for mentioning this subject
    We are trying to hard to do initiatives
    to urge ppl to clean up and to make a change in there behaviors
    i hope your blog will make a different
    any one is interested in the recycling or in activities please contact Jordan Environment Society
    Tel. +962.6.5699844
    Fax: +962.6.5695857
    JORDAN ENVIRONMENT SOCIETY (JES)
    www.jes.org.jo

    for more information you can contact me on
    info@jes.org.jo, or call me @

    ReplyDelete
  2. you're welcome safa'
    thanx for dropping by and sharing the article with your friends :)

    Yazid

    ReplyDelete
  3. Thanx Safa' for sahring this blog with me and thank you yazid and farah.

    i would like to highlight on our initiative called "Don't mess with Nature" which was launched mid August in full support and cooperation with the public and private sectors.

    We are always embarrassed of the photos we receive

    Check our activities and more details at:
    http://www.facebook.com/group.php?gid=116353366906
    from the tourists about trash in a beautiful setting.

    ReplyDelete
  4. Thank you JITOA for your comment,i'm glad you liked our article...
    great group you got their on facebook...
    i already joined it...
    and i'm ready for any help :) u can contact me through safa' :)

    thanks for dropping by :)

    Yazid

    ReplyDelete
  5. sob7an mo3'ayer al 27wal !!!!!!!

    ReplyDelete
  6. lol sho malek safa' kol had 3shan ma a5adtek el sobe7 ? :)

    ReplyDelete
  7. اخ يزيد ..
    ما ابدي احبطك ، بس:
    العطار لا يصلح ما افسده الدهر !

    بس بردو خطوة حلوة انك تقدر توصل انتقاداتاك بهاد الاسلوب "الرشيق والواعي"

    بتمنى الوضع يتحسن والواحد يصير بتصرف بالشارع متل ما بتصرف في بيته.

    سواء بالنظافة أو حتى "الكلام"

    اخ يزيد
    ع طول بانتظاركم.
    موفقين

    ReplyDelete
  8. شكراً lady... :)
    إحنا بنعمل يلي علينا و بنوصل الفكرة... ويلي بيفهم هوه رح يتغير و يلي ما بفهم هادا عليه السلام :)

    يزيد

    ReplyDelete