!!! بكره الشتا

سألت كثير ناس عن رأيهم بالشتا و إنه إذا بيحبو ولا لأ, فكانت معظم الأجوبة من البنات إنه يااي شو إنه الشتا بيجنن و حلو وكتيييييييييير رومنسي… بسأل الشباب بيروح فاقعلك Pause شيوخي و بيقلك المطر خير يا إبني... بس أنا مش شايف إنه حلو ولا بيجنن ولا رومنسي و عارف إنه خير و زرع و مش عارف شو... بس هل إحنا حكومتنا (الله يخليها بلا ما يزعلو) مجهزه شوارعنا لهل شتا؟ أنا أول إشي بشوفه بالشتا الشوارع الغرقانة و الزفتة يلي قبعت من محلها و التصريف اللي زي العما و السيارات يلي على جنب الشارع و حوادث... مبارح تخيلو نفق سيارات مسكّر و معبا مي, يعني بالمختصر نفق ما في تصريف...

أنا من خريجين الجامعة الهاشمية فيعني لما أروح عالجامعة كنت أفوت إشي إسمه رغدان, وما أدراك ما رغدان بالشتا... أكبر تجمع للطينة و القرف و زيت محركات الباصات... بتوصل هناك على شكل بني آدم و بعدين بدك تشمر هالبنطلون عشان تستعد للغوص في معركة ركوب الباص (عالواقف طبعاً) هاد بيدفش من هون على طرطشة باص خيانه* من الخلف على زواريب مياه من الزينكو يلي فوقك بتوصل الجامعة على شكل جندي طالع من الحرب... طبعا هاد كله غير التكاسي يلي بيكون ينقي الركاب تنقايه و إنتا و حظك عاد....

و برجع للبنات يلي بيشوفو الشتا رومنسي إنه يعني شو الرومنسية إنك تطلع بالشتا و تنبلّ و تتطرطش و طيّن و بس تفكر ترجع على سيارتك تطفي... غير الكاّبة النفسية تاعت الجو العام... و خذلك عاد واحده من هال ناس يلي بيكونو حبيبه بالشتا حبيبها يتركها... و تحط أغنية حبيتك بالصيف... نطرتك بالشتا... أي حتى فيروز كانت عارفة إنه رح يتركها بالشتا... وبس خلص فشيت غلي...

* باص خيانة هوه باص بيعبي الطلاب عالواقف و القاعد بدون ما يعبي ركاب من الدور و دايماً بيجي غدر.

مكالمة دولية

أول إشي بتأسف إني طولت لأكتب عالمدونة لإنو بعيد عنكم حضرتي محاسب و بتعرفو شو الوضع أول السنة... :P كثير شغلات صارت حواليه من تغيرات زي مثلاً ضم المواقع الإلكترونية لقانون الطبع و المنشورات تحت شعار "إخرس يا شعب" بس أنا لسا مصر إنّا عنّا حرية تعبير ورأي طول ما أحنا عم نحكي الإشي الصح و بعيدعن القدح و الذم الخاطئ...

موضوعي اليوم عن الشوفير تاع الشركة عنّا يلي تخالف مخالفة سير لإنو عم بيحكي تيليفون, إجا علي بيحكيلي حجزولي الرخص لإني بحكي تيليفون, طبعا أنا إنو وحّد الله يا زلمه! على تيليفون يحجزولك الرخص؟! حكالي إنهم عاملين حملة قال... المهم من هون لهون اليوم الثاني بيجي علي بيحكيلي دفعت 65 دينار عشان أدفع المخالفة و أرجع الرخص... طبعا أنا لهون و قبّعت معي!!! كيف و ليش و إستحالة ومن هالحكي لبين ما طلّع الوصل يلي دفعه للأمانة (الله يخليلنا إياها) و يلي شايفينه...

التهم : إستخدام السائق الهاتف أثناء السوق وكان الهاتف أو جزء منه محمول.

الغرامة: خمسة و ستون دينار ينطح دينار والدفع خاوة فقط لا غير

65 دينار على تيليفون... يعني (الله يفقهم) تحت أيا قانون أو أيا بند سلخو هالزلمة 65؟ تحت بند حملات لم مصاري من الشعب؟ ولا تحت بند "إخرس يا شعب بنعمل يلي بدنا ايا"؟

القصة إنو بحكيلو طب شو بدك تسوي هسه؟ بدك تعترض ولا بدك تعملك شغله؟ حكالي يا زلمة انا الشغل فوق راسي وين بدي أقعد أعترض و أسخّم إذا بدي أطارد ورا 65 دينار من دائرة السير رح أدفع قدهم إجازات.. فليش الغلبه؟

فعلا ليش الغلبة؟

و بعدين قعد يحكيلي عن شرطي هناك عم بيحكي لزميله "يلاااا يا زلمة عجِّل!! خَلَص النهار بدنا نترزَّق!!" إشي بصراحة يعني بيفتح النفس!شكلهم بيعطو عمولة!!قال والله نزل البونص هاي السنة دفاتر مخالفات...

 لكل يلي ما بيعرف قديش مخالفة التحدث بالهاتف بحب أحكيلو أنها 15 دينار بس شكلو صاحبنا كاين يحكي دولي... 

فتح و حماس, ضفة غربية و غزة

يعني إنو شو قصة فتح و حماس, أيام الحرب على غزة ما بتسمع إلا فتح و حماس و بتسمع كنت ضفة غربية و غزة مع العلم إنو الضفة الغربية مكانها بشرق فلسطين بس سموها الضفة الغربية عشان تعرفوا إنو هون بتنتهي فلسطين يعني إنسو عكا و حيفا ويافا هدول مش إلكم, وإنتو إعترفتو بهادا الشي بتسمية ضفتكم الشرقية غربية, كان نفسي أسمع كلمة فلسطين طول الحرب حتى بالمظاهرات (فداكِ يا غزة) الإنقسام صار و صار و تغلغل فينا كمان و إحنا مش حاسيين…

أنا لا مع فتح ولا مع حماس الله ينعن أبو اللي جابهم التنين, بس لما صارت الحرب الأخيرة على غزة أنا أكيد كنت مع حماس لإنو شو ما صار هدول فلسطينية و عرب و مسلمين, ما باجي بحكي والله هدول حماس همه جابو لحالهم الحرب هاي زي واحد مصري هادا رأيه كان, إستفزني لدرجة إني شطبتو من الفيسبوك تاعي, لإنو واحد زييو الحكومة بس بدها إيا يضل يحكي هيك عشان يزيد الإنقسام أكثر و أكثر ويخلينا نفكر إنو كل الشعب المصري هيك عن طريق حملاتهم عالفيسبوك…

بعدها صارت قصة غولدستون و فضيحة السلطة الفلسطينية , طب وين الإشي الجديد بإنه السلطة الفلسطينية متواطئة مع إسرائيل و أمريكا مهوه أختي الزغيرة لما تشوف عباس بتحكي عنو عميل, بس إحنا بنحب نلت و نعجن بالحكي كثير عشان نكبر الموضوع, حجاج بجريدة الغد ما خلى إشي إلى رسمه عن الخلاف الفلسطيني الفلسطيني ويعيد ويزيد! طب خلاص فهمنا!!

بالآخر بحضر فيديو عامليته حماس و حاطينه على قناة الأقصى حاطيين في واحد من السلطة الفلسطينية عم بيجاوب على أسئلة جندي إسرائيلي بطريقة كتير بتقهر و بالآخر بيمسح طاقيته يلي بيكون عليها علم فلسطين بجزمة الجندي خلاني أكره حماس و فتح أكثر و أكثر…

أيام زمااااااان

رح يستمتع بهادا الإشي يلي رح أكتبو الناس يلي إنولدو بالثمانينات وعاشو بالأردن, أيام ما كان الواحد يصحى الصبح يحضر قرآن على عمان الأولى ويضل يستنى عشان يبلش مخلص صديق الحيوان و بسيط و سبانك و الحوت الأبيض وفي قصص الشعوب أي كنا نحضر البؤساء و الدونكي شوت!!, كان ما في إلا عمان و سوريا , و سعيد الحظ يلي بتلقط عندو السعودية أو قناة إسرائيل مع إنو مش عارف شو كان ييجي عليهم, أي من الزهق أنا و أخوي كنا نحضر بريد الأطفال على سوريا :S أيام ما كان في "أنتين" الله يرحمه شالو و جابو صحن...

أيام ما كان مصروفي 10 قروش و بقدر أجيب في أكثر من شغليتين, وبتروح عالدكانة بتوخدلك وجبة مشبعة 1 روكو + 1 عصير دمعة و بتطلع كسبان, يعني الوضع الإقتصادي شكلو كاين منيح :P على كل حال كان الواحد لا بيعرف سياسة ولا بعرف شو عم بيصير حواليه, كان في عنا لعبة أنا و ولاد عمي كيف بدنا نقتل بوش, شكلو كاين قالقنا كثير زمان, كنّا شعب بسيط... عدوّنا واحد والكل بيعرفه ما بدو ثنين يحكو في, كان التيليفون الأرضي الوسيلة الوحيدة للإتصال... والكل بيحضر نفس نشرة الأخبار ونفس المسلسلات ونفس الأغاني, كنّا بنفرح لأبسط الأشياء و هسة عنّا كل إشي وما في إشي ببسطنا... كان إذا بدك تحب وحدة بدك تحسب ميت حساب كيف بدك توصلها لا في عندها Facebook ولا خلوي يعني إنتا و حظك مع الحمام الزاجل...

أيام ما كان في براس العين ملاهي عمري ما فتها بس بتذكر كان فيها هيك عروس بتدور بتلخم الواحد, و كانت المكتبة يلي عنّا "مكتبة أمواج" بمثابة Toy's R Us بالنسبة إلي, و أول أتاري إشتراها أبوي a77a التكنولوجيا كتبت عنها رولا هون... و بعدها إتطورنا جبنا Family و بعدها Nintendo يلي كنّا ننتفخ و إحنا بننفخ عالشريط (لسا مش عارف وين المبدأ إنك تنفخ عليه).

بالنهاية أنا من أيام ما كنت زغير و بسمع أبوي بحكي آخ عأيام زمان أحلى من هالأيام بألف مرة و ما كنت أفهم عليه, يعني كانو عايشين بلا إشي و كانو مبسوطين؟ وهادا الإشي يلي أنا رح أحكي لولادي بس أكبر لإنو الواحد مش بحس هديك الأوقات أحلى عشان هيه أحلى, لكن بيحسها أحلا لإنها طفولته... و أنا عارف إنو أخوي يلي عمرو هلا 7 سنين رح يكبر و يحكي لولاده نفس الحكي...

Theremin تعرّف على آلة الـ

عمركم سمعتو بآلة موسيقية بتعزف من دون ما تنلمس؟؟؟ :D صديقي مهند هداك اليوم بعتلي فيديو عالـ Youtube صدمني قديش ممكن يكون تفكير الإنسان الموسيقي رائع!

آلة الـ Theremin هيه آلة موسيقية إليكترونية  بتشتغل من دون ما تنلمس, زي ما بتشوفو بالصورة, إخترعها عالم فيزيائي روسي عام 1920, لما سمعت صوت هاي الآلة تذكرت الموسيقة يلي بتتطلع بأفلام الرعب تاعون أيام زمان... :P

طبيعة عمل الآلة بيكون فيها حديدتين وحدة بتكون عشان تعطي النغمة العالية و الواطية و الحديدة الثانية عشان تعلّي و توطّي الصوت, الآلة بتعطي النغمة على قديش بتقرب إيدك من الحديدة وهيه آلة حساسة جداً لدرجة إنو النفس تاع الشخص يلي بيعزف عليها ممكن يأثر عالنغمة...

هسّا بلا كثرت حكي شوفو الفيديو الأول يلي في واحد بيعزف نغمة Mario عليها, وركزوا كيف الآلة ممكن إنها تنعزف مع فرقة كاملة بالفيديو الثاني... ركزو عالدقيقة 2:40

إستمتعوا..... :)

بتعرف شو هوه الإحتباس الحراري؟

أنا بصاراحة ما كنت أعرف إشي عنو قبل أشهر وبعد ما تعمقت بالموضوع وكان الفضل لصديقتي صفاء الناشطة البيئية بجمعية البيئة الأردنية وحبيت أتعمق بالموضع تأعرف عنو أكثر, رح أحكي بصورة بسيطة عنو وبطريقة مفهومة... إذا بتلاحظو الصورة يلي رسمتها (فنان أنا :P) بتبين الإشعاعات يلي عم تطلع من الشمس إشي منها عم ينعكس من الغلاف الجوي و إشي بيخبط بالأرض و بيرجع يطلع و إشي بيخبط بالأرض و بيضل داخل الغلاف الجوي لإنو عم بيواجه إشي وهوة راجع إشي إسمو الغازات الدفيئة يلي زادت عن حدها مع الثورة الصناعية زي مثلا ثاني أكسيد الكربون و الميثان... و هادا الإشي عم بيزيد من درجة حرارة الأرض و هادا الإشي بيعمل كوارث بيئية زي الفياضانات...

معلومة: بتعرف إنو في دول عم تغرق زي بنغلادش و الملديف و إنو في دول كثير كمان معرضة لهل إشي زي قطر, عُمان و دلتا مصر؟

بان كي مون جمع الدول بكوبنهاجن عشان هالإشي يلي عم بيصير و عشان يخففو من الإنبعاثات يلي بتسببها الدول الصناعية, طبعا المفروض إنو يكون مؤتمر مفتوح ونشطاء بيئيين يشاركو في, بس قلبت كلها إجتماعات مغلقة لرؤساء الدول الكبيرة زي أوباما حبيب الشعب يلي كان من أكثر المشجعين للفكرة و بعدين نخخ...  و طبعا المواقف العربية المشرفة!!! زي السعودية يلي ما تنازلت ولا بإشي لحماية البيئة و رح إتضل تنتج بنفس الطريقة يعني راحو على هالإجتماع لحماية البيئة و كل واحد جاي بطيارتو الخاصة منهم يعني لوّثو البيئة كلها و ما عملو إشي لو ما راحو أحسن...

كل القرارات يلي طلع فيها المؤتمر هيه شغلات ما بتفيد إلا الدول الكبيرة و رح تطلع على راس الدول النامية.

مستوى وعي الشعب عنا بالبيئة طبعا صفر و على مستوى إحنا كأفراد الواحد فينا الزبالة تاعتو بيكبها و كياس البلاستيك بيكثر منها (بتقدرو تقرأو المقال تاعي عن هاد الموضوع) عمرنا ما رح نفهم شو عم بيصير حوالينا, ما بنعرف إنو كل سنة عم بيقل المطر بسبب الإحتباس الحراري بس بناخدها من ناحية بيجوز الله عضبان علينا! و بنروح عالمسجد و بنضل ندعي اللهم سقنا الغيث... طب ما هوه ربنا حكالنا إنا نوخد بالأسباب! بس لأ بنضل مصرين...

 شكرا لصفاء طبعا على المعلومات و لإنها ساعدتني بهاد المقال  :)

على راسي سيدي!

مبارح روّحت عالبيت المسا ولا أخوي بحكي معي بحكيلي روح إشتريلنا خبز, فإنو الواحد بيكون قرفان حالو و خبز!!! رحت طلعت عالمخبز يلي قدامو ألف سيارة... بس لفت إنتباهي باص واقف بالعرض مسكر على مصف لـ 3 سيارات الأخ... وقفت ورا و زمرت زمور عالخفيف عشان حرام بلكي سرحان... ما رد... رحت زمرت كمان مرة عالعالي برضو ما رد... ضليت أستنا بحضرتو لإنو بدي أصف! و صار في سيارات كمان وراي بدهم يصفو كمان, و الشب متنّح قلت هيه مطولة!! رحت سحبت حالي و صفيت بعيد شوي و مريت من جمبو بحكيلو "إنتا عارف على أكم مصف مسكّر؟" (بطريقة كثير منيحة) بحكيلي "و إنتا حضرتك بصفتك مين بتحكي معي؟" في إنو أنا "لا بس حبيت أحكيلك إذا كنت ناسي يعني" فلسه عم نحكي مرّت سيارة شرطة...

طااطاطاطا حررررك يا كيا!!!

الشب: على راسي سيدي...

طبعا أنا بس شفت هيك, عرفت إنّا شعب بنحب البهادل :D

دايما بناخدها شغلة شخصية إنو يعني لو رد عليّ بنقص من كرامته الأخ بس إذا الشرطي حكالو إنقلع يا تــــيــــت شيل سيارتك عادي بيكون هيك بكامل إنبساطو!!

فتذكرت فيديو فرجاني إيا صديقي عمر...