الفرق بين الوطني و الوطنجي

بعد الأحداث التي تحدث حولنا و سقوط أنظمة كان سقوطها كحلم مستحيل... قررت العودة للكتابة بعدما شُغلت بتمثيل دور المواطن الذي يركض وراء لقمة العيش و الإكتفاء بسماع الأخبار... ولكن هبت رياح التغيير في الأردن و الثورة الشعبية ضد الفساد إمتدت من تونس إلى مصر و ليبيا و اليمن و البحرين و و.... و أخيراً إلى الأردن.

 شاركت بكل المظاهرات المطالبة بالإصلاح, و قمت بتصوير كل شيء, أنزلت بعض من الصور و الفيديو على الإنترنت, تعرضت للنقد من كل من حولي... فالبعض شكك بوطنيتي لنشر الحقيقة و البعض قال لي (أصلاً هاي مش بلدك فعلى شو حارق دمك)؟ أما المواطن المشغول بلقمة العيش قال لي: بكفي إنا عايشين بأمان...

فهل فعلا أنا غير وطني لأني صورت الفيديو هذا؟ لقد كنت من الناس التي ذهبت إلى الدوار فقط لأنقل الحقيقة... لم أنتمي إلى أي حزب و حتى أن أكون تحت شعار شباب 24 آذار لم يعجبني... نعم رددت "الله أكبر" و "خبز, حرية, عدالة إجتماعية" و "سلمية" ولكن في كل مرة رددت فيها وراء حزب... أحببت أن أكون تحت شعار "المواطن الأردني"...

فلتكن نظرتنا بالأمور أوعى, كيف تقول لي (بكفي إنا عايشين بأمان) و أنت هذا حق من حقوقك كمواطن؟ أنت تدفع ضرائبك ليكون هذا الأمان متوفر لك فهو ليس "ميزة" بل "حق"... و كيف تقول لي (هي شغلك منيح و بتاخد راتب مشالله عليك شو بدك بالإصلاح؟) فلننسى ولو لمرة مبدأ "اللهم نفسي" فإذا كنت أنا أعيش حياة جيدة ... أخي تخرج قبل سنتين و ما زال يجلس بالبيت, و إذا أخي وجد عمل فهنالك 13% من شبابنا يعانون من البطالة... فكيف تريدني أن أفكر بنفسي فقط؟

أخي (الوطنجي) لا تشكك بوطنيتي لإني (أردني مش أصلي) فأنا ولدت بعمان و عشت حياتي كلها في الأردن, درست و تعلمت في المدارس الحكومية و عندما تخرجت توظفت بشركات أردنية, لم تسمح لي نفسي يوماً برمي القمامة على الأرض, ووقفت شامخاً كلما عزف النشيد الوطني, ودعوت للملك بكل صلاة جمعة... من أنت لتحاسبني؟ و تقول لي عبارة "أهلا بالكل في الأردن"؟ أنا كنت بدوار الداخلية أهتف للإصلاح الساعة الواحدة صباحاً و أنت أيضاً كنت هناك تطعن بشرفي وصفقت لك, لإني أريد مصلحتك...

هذا هو الفرق بيني و بينك أيها الوطنجي...

صحيح إني خروف

اليوم قلت يا زلمة روح إتبعزق و إسلخها بكوفي شوب من الآخر و أرجل أرجيلة تمام بلاش قهوة منا و فينا اليوم و المصاري وسخ إيدين والواحد ما بيعيشش إلا مرة ومن هالحكي… رحت طلعت أنا وصاحبي على الكوفي شوب الفلاني بجبل عمان تحديدا, إجا الشب و تفضلو و مش عارف شو وشو بتحبو تشربو…الأرجيلة بـ 4 دنانير قلناله بس بدنا أرجيلتين وسلامتك, و كل واحد طلع الابتوب تاعو و قعدنا و جابولنا شغلات و بوشار و بحكيلنا هدول ضيافة فإنه الله يزيد فضلك…

خلصنا وإنبسطنا ولعبنا و بدنا نروح… الحساب يا معلم… 15.20 دينار…

صاحبي الله ستر لحقنا بكلونيا لَصحي… سبحان يلي خلى ال 8 دنانير 15 أي والله لو إنهم بيبيضو! ناديت البنت يلي هناك بحكيلها إشرحيلي شو هاد بالزبط… فحكتلي ما هو في 3 cover charge فإنه انا اه صح... و عم بدفع و أنا مش مقتنع... عشو الـ Cover Charge  بالزبط؟؟ و يا سيدي 3 دنانير هيك الباقي شو؟؟ 10%  Service Charge و 16% ضريبة مبيعات... أحا

يعني نصب عيني عينك! نفسي أدخل بحياتي كوفي شوب ما أنصدم بالفاتورة تاعتو و أحسها واقعية, و ليش ما تنكتب الأسعار عالـ Menu و تكون صح؟ ولا بعد ما يوقع الفاس بالراس وتتعكم؟ يعني الواحد بدو يتلقاها من وين ولا من وين؟؟؟ من شركات الإتصلات ولا من الحكومة ولا من الضرايب ولا من جرار الغاز ولا من الكوفي شوبات؟ معقولة يعني إذا بدي أطلع على محل و أأرجل في أدفع سبع دنانير و نص!!! يعني عفوا من المحل بس والله لو إني مأرجل أرجيلة فيتامين سي و الفحم توصايه من المريخ و الطلة تاعت المحل من القمر على الارض  ما بدفع هيك...