أشياء بكرهها بالـ Facebook

*بكل Event لازم تلاقي واحد كاتب "أسف أنا برّة البلاد" إنو يعني لو كان بالبلاد كان راح حضر...

*الناس يلي بتعمل Add as a friend وهوه أصلاً مش عارف مين هالشخص هاد! يحسهم بيكونو يدورو دوارة عالبنات وبس يشوف تعليق منها على شغلة طُب ولا بيعطيها Add بلكي شنّصت... زي ما كتبت Rula بمدونتها...

*البروفايلات يلي بتكون مشاع للعالم ما في أي نوع من أنواع الخصوصية... غير إنو أكثرهم بروفايلات بنات عاملينهم شباب عشان يا إما يلم Poker Chips أو لما يعمل Group يقدر يبعت دعوة لآلاف الناس... ولا يا حبيبي التعليقات على الصور تاعت هالبروفايلات الهش بشك... شغل كروت معايدة... بتقدرو تقرأو عنهم هون كمان

*كل واحد يعمل Group بدو الكل خاوة يفوت في... يعني صاحبي عمل Group و بدو إياني أفوت في و بعرف إني ما إلي دخل بهال مواضيع بس بحكيلي يا زلمة بس فوتو إنتا و ما عليك ... إنو إزا أنا دخلت بـ Group و ما فوتّو ولا مرة إنتا شو ستفدت من كل هالقصة!!

*من أكثر الشغلات يلي بتستفزني بالـ Facebook هيه الـ Quizzes ويلي كتبت عنها من قبل هون مش ضروري أحكي عنها, بس الشغلة الجديدة هيه الزفت الألعاب التافهة تاعت الـ Facebook واحد بزرع و بحصد الأخ و بيضيع 10 ساعات عهيك شغلة و الثاني بعمل مطعم و واحد شاغلّي حالو café تاعو يعني إشي مبشّر بالمستقبل... و حكيت بديش أطُب فيهم بس بشتغلو بالواحد يا يا يا يايا يزيد إفتح مطعم أو يا يا يا يا يايا يزيد كون جاري بالمزرعة!!! بعرضكم حلّو عني!!

*طبعا الناس يلي دايما الـ Status تاعتهم دمار نفسي وممزعين حالهم... أو الناس تعون حكمة اليوم بحس حالي مشترك بخدمة التليتكست...

*الـ Photo Tags يلي ما بيكون حدا فيها بس بيكون مكتوب "Describe me in one word" إنو بالله عليكم ما بتقدرو تكتبوها بالـ status الممله تاعتكم!! و بيوصلك 100 Email على 100 Notification...

*ليش الناس عالفيسبوك بيعملو Poke؟ لسه مش عارف وين المتعة أو الفائدة من الموضوع...

ووو بس...

جرائم الشرف بالأردن

مبارح كانت جريمة الشرف الـ 19 بالأردن من أول السنة لهلأ, طبعا هدول الـ 19 المعلن عنهم غير الحلات يلي بيتسترو الأهل عليها عشان الفضايح, ظاهرة "الشرف" صارت عم بتزيد و المسؤولين بحاولو يخلوها إنها حالات فردية و مش موجودة...

طبعا أنا برأيي أساس المشاكل هيه المواد 340 و 98 من قانون العقوبات الأردني يلي بما معناهم تتخفف العقوبة على  القاتل يلي إلها دخل بالشرف اذا مسك المجني عليها متلبسه بعلاقة جنسية غير مشروعة و القاتل كان بيقرب للضحية أو كان معصّب الأخ.... طبعاً أنا بحكي تخفيف يعني ممكن العقوبة تتخفف للنص إذا مش أكثر كمان, غير العيله يلي بتستخدم الحق الشخصي "الفيتو" عشان تستأنف الحكم و تطلب كمان تخفيف...

بالمقابل البنت يلي ممكن إنو ما تكون عاملة إشي بس الشك فيها خلاها عرضة إنها تموت من دون ما حدا ياخد حقها لا حكومة ولا أهل وطبعا أغلب الضحايا من جرائم الشرف بيكونو عذارى, أما الشب عين الله عليه بيروح و بحكي لصحابو شو سوّا و بيكون مكيف لإنو ما في عندو إشي يخاف منو...

يعني شو هوه شعور القاتل لما يقتل أختو؟ هل هوة بدافع الدين؟ أنا ما تعتقد الدين حكالنا أقتلو هيك... أعتقد إنو هاي عادات بمجتمعنا لازمها تغيير جذري... يعني مين إنتا تحكم على وحدة و تقتلها ؟! يا أخي مش عاجبيتك أو شاكك فيها قلعها برة البيت إذا ما بدك إياها... يلي هيه أختك يلي تربيت معها... بس تقتلها؟؟!!!

كل المقالات يلي كنت أقرأها عن جرائم الشرف كانت بتربط الوضع الإقتصادي بالموضوع, يعني نسبة جرائم الشرف عند الناس الفقراء بتكون أكثر من الناس الأغنياء بكثير... و أكيد الوضع الإقتصادي بأثر على التعليم, لإنو أكثر الفقرا بيضطرو يتركو دراستهم عشان يشتغلو و أغلب القاتلين بجرائم الشرف همه ناس مش متعلمين و مش متجوزين يعني ما في عندهم إشي يخسرو...

يا جماعة الموضوع زاد عن حدو وصار لازم يكون في توعية أكثر!

على كل حال هينا بنستنا بمجلس النواب الجديد, على الله يقدرو يعملولهم شغلة ويلغو هالمواد بالقانون.... أو على الله هالشعب يقدر يصوت ليلي إلو الحق بالكرسي مش لقرايبو و ولاد عشيرتو...

جيل جديد

أربع أيام مع الـ Freedom House (The New Generation Program) عن وسائل الإعلام الجديدة, ضم مشاركين من عدة دول عربية, إستمتعت كثير بهال أربع أيام, واستفدت طبعا من خبرات المشاركين يلي كانو واصلين مراحل كتير متقدمة من ناحية الإعلام الحديث...

في أول محاضرة مع الأستاذ يحيى الشقيري كان التركيز على الناحية القانونية و التدوين و إكتشفت إنو سقف حرية التدوين عنا عالي جدا بالأردن, لدرجة إني ممكن أذم القانون الأردني من دون ما أحاسب قانونيا مثلاً, أما المحاضرة الثانية كان تركيزها على أنظمة الحماية لمدونتك أو للموقع تاعك و تفحص قوة الـ Password تاعك, و كمان عن إستخدام الصورة بالإعلام الجديد, و إنطلب منا نعمل فيديو من أربع مواضيع بمدة ما بتزيد عن 3 دقائق, أما المحاضرة الثالثة كانت مع 7iber.com عن كيفية تسويق المدونة أو زي ما بحكو تجيب رجل عليها :P عن طريق ربط المدونة بعدة مواقع لتوصل لأكتر عدد من الناس كـ Twitter, WatWet, Facebook والمحاضرة الرابعة و الأخيرة كانت ورشة عمل الفيديو يلي بدنا نعملو.

"بالنهاية استمتعت بخفة الدم المصرية و الأفكار اللبنانية, أحببت روح المغرب العربي و تونس, تأثرت بالصمود الفلسطيني و طيبة أهل اليمن... أمل من الجانب السوري لحرية التعبير, وإنفتاح من الأخوة الجزائريين, والمستقبل في عيون الخليجيين من الإخوة السعوديين و سلطنة عمان"

Thanks to Freedom House
and thank you Imad For This Video 

دقيقة 90

أنا تأخرت لبين ما أكتب عن الموضوع, بس حبيت أعرف شو عم بيصير و على مين الحق؟ تابعت الأحداث يلي صارت بالقاهرة, لما المصريين رمو الحجار على باص الاعبين الجزائريين, و تابعت حجج الشعب المصري إنو الجزائريين ضربو حالهم و بعدين أثبتت العربية بفيديو مسجّل إنو فعلا صار هالحكي و انا بصراحة كنت متعاطف مع الجزائر من يلي صار فيهم, و بعديها إجت المباراة الحسامة وشفت الجزائريين شو سوو, طبعاّ من دون التهويل الإعلامي الرخيص المصري, وفعلاً كان غلط كبير يلي عملوو المشجعيين الجزائريين, و ما في إشي بيبررو...

طب هلأ الغلط على الجزائريين؟ ولا على المصريين؟ ولا على السودانيين يلي سحبو قواتهم من دارفور عشان مباراة؟

الغلط مبدئيا كان على الإعلام يلي كبّر الموضوع كثيييير, يعني عم بحضر مقابلات عاملينها مع ناس رجعو من السودان على مصر, فواحد بحكي " أنا شفت أودامي واحد جزائري دبح واحد مصري بالمطوه حسب المعلومات اللي وصلتني!" إنو هوه شاف الموقف ولا واحد حكالو ولا هوه كاين بحضر مباراة فرنسا هداك اليوم الله أعلم, لأ و المذيع مش هواية إلا شويّه! "إخواننا بالسودان بيتدبيحو , أنقذوهم!" حسيت الجزائر فتحت جبهة و أعلنت الحرب...

بس الغلط الأكبر كان على الحكومات يلي مش قادرة تكون مثال لهل الشعب الفاضي, الغلط كان على وزير الرياضة الجزائري يلي ما سلم على نظيره عشان يتخطو الموضوع, الغلط على اللعيبه يلي بالملعب نزلو طوش و فاولات من أول المباراة لآخرها! أصلا مباراة حواري كانت...

الغلط علينا يلي خلينا ناس زي هدول يكونو نجومنا...

بالوقت يلي إنحرق دم المصاروة و الجزائريين على مباراة 90 دقيقة كان في بيوت عم تتهدم بالقدس الشرقية ما حدا حرك جفن عشانها...

" نساؤهم لعب ، ارضهم ذهب ، رجالهم مع من غلب ، يجمعهم الطبل ويفرقهم العصى"

-عمر بن العاص رضي الله عنه

نحكت للمصريين و هلأ بحكيها لكل العرب....

*******************************************

Note: I changed the name of the blog from Farah And Yazid's Blog

To Yazid's Blog

and i changed the address to

http://yazzzidzblog.blogspot.com/

موسم الشرطة و المواطن

شو قصة الشرطة و المواطن مش طايقين بعض هاليومين؟ خلال شهر 5 مشاكل بين الشرطة و المواطنين أدت لوفاة ثنين و إصابة ثلاث! من متى المواطن صاير يحكي عللي بصير معو؟ ما هو طول عمرو بياكلها وعالساكت, ولا الصحافة مواسم ماشالله مرة بيدققو على حالات الإنتحار و مرة على المش عارف شو هاليومين شكلو موسم الشرطة و المواطن, وبديش أحكي من متى الشرطة عنا بتضرب لإنو طول عمرها بتضرب مش جديد.

المواطن يلّي مات من الضرب صار يعرف إنو في إلو حقوق, والشرطي لازم يعرف وين بتنتهي صلاحياتو, و ما في حدا فوق القانون, الشرطي إذا ضرب واحد و هوة بيعتقلو معناها إنو صار قاضي و حكم عليه إنو مذنب, لأ و مش بس حكم!... و نفذ الحكم كمان.

عالطرف الآخر المواطن, إبن العقيد الملازم الرقيب الركن من عشيرة بدنا عطوة, بدهم يبينو للشارع الأردني إنو ما حدا بخبطلهم على طرف, وبدهم جنازة يردحو فيها, وبينزلو هالشباب يكسرو الشارع و يحرقو و يسوو العجايب... لبين ما يستنكرو وجهاء القبيلة الأعمال الهمجية.

هيي قصة إنو الشعب صار واعي؟ ولا قصة إنو الشرطة أخدت عين عالمواطن؟ ولا قصة إنو الصحافة بتنشر هيك شغلات و بتعملها مواسم عنا؟ لسا مش عارف...


يزيد

نظريات المؤامرة

موضوع نظريات المؤامرة موضوع كثير حلو للناس يلي عقلهم قادر يستوعب أيا إشي بس الناس يلي ما بدها تفكر أو تحلل ما تغلب حالها و تقرأ المقال...

أول مرة سمعت عن الموضوع و شدني إلو إنو إبن عمي كان كاتب عالـ Facebook تاعو إنو هل تعتقد أن الـ Illuminati  هي حقيقة أم وهم؟  طبعا أنا ما بعرف كنت أصلا شو يعني  Illuminati  زي ما أنا متأكد إنو كثير ما بعرفو و صرت أدور و أدور وأقرأ من الإنترنت وأحضر فيديو...

بعدين بلشت أقرأ عن نظريات المؤامرة... طلع عالم كثير كبير, المهم... المبدأ تاع نظريات المؤامرة إنو عالمنا عم بيتحكمو في مجتمعات سريّة و بدهم يسيطروا على العالم و يعملو إشي إسمو The New World Order يلي حكى عنو بوش الأب, إنو يصير في عنا حكومة عالمية و مشاكل العالم كلها وحده...

كيف نشأة المجتمعات السرية؟بشرح مُبسط عن طريق عيلتين كانوا بـأوروبا و ربحوا مصاري كثير عن طريق البورصة.... و صاروا بدهم سلطة... وطبعا أيا واحد معا مصاري بيقدر يجيب السلطة بسهولة...

هلأ وين إحنا بالموضوع كله؟ يعني بيجي علي واحد بحكيلي يا عمي يتطاوشو عالسلطة و إحنا مالنا و مالهم! هلأ الموضوع إنو إنتا كل يلي عم بتشوفهم قدامك من رؤساء عالميين كبار زي أوباما مثلاً هوه عبارة عن Puppet يعني اللعبة يلي بتكون ممسوكه بحبال... يعني في ناس بتحكموا في و بيحكولو إيش يعمل... و هدول همة الواجهة, بدهم يخلو الشعب مشغول بحالو , كيف؟ بتسخيف طريقة تفكيرو بالموسيقى و الأفلام التافه, و عن طريق الإقتصاد يلي بيخلي المواطن مشغول بحاله و بدو بس يدبر لقمة اليوم, عن طريق المخدرات و الأفلام الجنسية.... بدهم يطلعو الناس عن دينهم أكيد عن طريق إنهم يبينو الشيوخ ناس إرهابيين و يطلعو القسيسين ناس بيغتصبو ولاد زغار... أهم إشي يضلو الناس مشغولين بحالهم! ويحسو إنو الحكومات مهمة بحياتهم....

هسه كل يلي حكيت في فوق ممكن يكون غلط و ممكن يكون صح! خلينا نشوف شو في حقائق…

حقائق:

1-    أحداث 11/9 عملية داخلية لإنو البرجين يلي وقعو , وقعو سقوط حر, يعني لما وقع أخدو 10 ثواني وهادا إشي منافي لعلم الفيزياء, يلي بحكي إنو لو كل طابق وقع ع يلي تحتي بدو ياخد ثانية و في 400 و إشي طوابق, بس الطوابق أصلا كان فيهم متفجرات… و بعدين بحكولك ما لقو الصندوق الأسود بس لاقو جوازين سفر والله مسخرة.

2-   أوباما ما صار رئيس هيك من الفراغ, أوباما بيقرب لـ 6 رؤساء أمريكيين قبلو

3-     الهرم يلي على الدولار و يلي هوة ببين شعارهم.

4- إجتماعات سرية لأغنى رجال الأعمال بالعالم.

وكمان كثير شغلات و يلي بدو كمان أنا جاهز :)

ليلّي مهتمين بالموضوع في أفلام ممكن إنكم تحضروها علي الـ YouTube

1-    The Obama Deception (English)

2-    The EndGame (English)

3-    The Arrivals (English and translated to Arabic)



يزيد

V For Vendetta

هوة فيلم نزل بالـ 2006 تمثيل Hugo Weaving يلي بيضل لابس القناع لآخر الفيلم و Natali Portman يلي كلنا بنعرفها من فيلم Leon... الفيلم بيحكي عن قصة رجل لابس قناع بيعمل ثورة في بريطانيا على الحكومة الدكتاتورية ودايما بيكون سابقهم بخطوة... أحداث الفيلم بتكون بالمستقبل عام 1997 بوجهة نظر الكاتب... حضرت الفيلم 3 مرات السنتين الماضيات مرتين منهم كانو بـ 5\11 لإنو شغلات بالفيلم بتصير بهاد التاريخ (بديش أحرقو :P)...

ليش مستخدم القناع يلي بضحك؟ لإنو هادا القناع لواحد إسمو Guy Fawkes يلي حاول يفجر مجلس اللوردات البريطاني عام 1605, وإنمسك هوه و يلي معا و كلهم إنعدموا, طبعا هاي القصة حقيقية و Guy Fawkes من أشهر 30 شخصية ببريطانيا...

الفيلم في كثير معاني عميقة, يا ريت الكل يحضروا بـ 5\11 هاي السنة حتى لو كان حاضرو :)

People should not be afraid of their governments….

Governments should be afraid of their People…

Remember…. Remember

The Fifth Of November

يزيد